Read Karbi LUN 7 Bible Online

LUN 7 - Karbi bible

LUN 7

¹HEMPHU, ne Arnam, kechepachongjisi ne nanglong vang-lo; nephi phi nekehung kedo-an atum pen nang nephan nepajoktha,

²kalite hingho ason latum nephan pondetsi, hadak baduta nephan nepajok un-elo. Lapen latum hadak ne ingsek-i-po.

³O HEMPHU, ne Arnam, ne jongsi inutbak aphan, kechokche klemlote lapen inutbak nejirpo aphan pachobeilote,

⁴mate athe avepin pen ne hotur aphan avi pabulote, mate lahei angbong isibak ne klem-lote,

⁵ne hotur nephi phi nepahungdunnang, lapen nepanep-cheknang. Nephan nepathusop-ra nepathinang, Lapen longle athak nechethe pavepin pen padonang!

⁶Nangning thinon O HEMPHU, hotur atum aning kepung abe thurra arjapnon, nangning chepapung-ra neraptha.

⁷Ahok akangsai ke nangsi hang-lo, lasi kedo-an arat nangdung pangrumnon, lapen angsong pen pangrinon.

⁸Monit kedo-an aphan kangsai abang nang helo, ne bele nang ingsainon, O HEMPHU; ne dai ave pu nang chini.

⁹Nang ke dhoromi Arnam, lapen netum kematha, lapen akar-i kangsai a-Bang-lo. Kehingno amonit atum kehingno akam pangtonnon, Lapen akeme atum aphan nong-e-pinon.

¹⁰Arnam ne-Kerai a-Bang, laphan kekroi abangphan la pajok.

¹¹Arnam ke inut dhoromi kangsai a-Bang, lapen kehingno atum aphan khindeverlo.

¹²Latum jongsi atovar chepaprekprete, Arnam nokjir charsopo. La athai pangkangsi arlenpo;

¹³La kepathi arisim cheponpo, lapen la ame kekar-ang athai aso jongpo.

¹⁴Kehingno arat atum kosonsi akehingno kemathadam loma langtha, latum kepasungji mang-lo lapen kepachobei chesekelo.

¹⁵Bang aphan latum pham tot-lo, lapen latum methangsi chingnang-lo,

¹⁶lasi amethang kehingno akam pen ajok, latum amethang aduk chepilo, lapen latum vi kepabu pen ajok amethangsi phonang-lo.

¹⁷Ne HEMPHU aphan la ahok-akangsai apot chorolo, Kangtuinei a-Bang HEMPHU aphan Ne kero alun lunlo.