Read Karbi LUN 71 Bible Online

LUN 71 - Karbi bible

LUN 71

¹HEMPHU nangpen kerai kelongjisi ne nanglong vang-lo; nephan paremlongri!

²Nang dhoromi apotsi neraptha lapen nepajoktha!

³Ne chepachong adim plangtha, lapen nekeraiji isi kangtangrak apaisong plangtha; nang nechong lapen kehingno amonit atum ajakong pen nepajoktha.

⁴Ne Arnam nang kehingno amonit atum pen nepajoktha, kechenek-ot lapen kehingno amonit atum ajakong pen.

⁵Ninghang aling keklem-un a-HEMPHU, ne nangphansi ning chethelo; ne riso ahut pen ne nangphansi chikilo.

⁶Nekai isi ne nangphansi charchak-lo, ne mahangkethek arni pen nang nephan nerailo, ne kaiketa nangphan roji.

⁷Nekai ke-ongdung aphan isi arjan plang-lo, Pima nang nepharman chedan pangtang-lo,

⁸Arni kangthim ne nangphan rolo, lapen nangnong pachethang-lo.

⁹Ne sarlo pura nephan nedengmori, nejakong ave pura nephan ne-ori.

¹⁰Ne hotur atum nephan kepathiji aninghang-lo, latum chethanlo lapen nebethursi kepavirji mang-lo.

¹¹Latum pulo, “Arnam laphan obup-lo, la aphi aphi dunnang lapen laphan nepchek-lonang; laphan kepajok abang avelo.

¹²Kehelo dori O Arnam, ne-Arnam; nerap seraknon!

¹³Nephan ketengkheng abang paremdetnang lapen pavirdetnang. Nereng kepasoji atum patheraknang lapen palangremnang.

¹⁴Ne kaiketa nangphansi ning chethe, un an ne nangphansi ropo.

¹⁵Nang kechingkime alam thanpo, la ne kechini an sose seta losini nang kejok alam ningjepo.

¹⁶Nangjakong ne roverji, keklem unpet a-HEMPHU; nang kechingkime alam ne pachethangji, nangphanchot.

¹⁷Ne riso ahut penta nang nephan nethanbomlo, lapen nang manghumeme akam nonpu ta thanbomlang.

¹⁸Non ne sartang-lo lapen nechu anta lok-et-lo, Nephan ne-ori O Arnam! Nangjakong-horang ne kevangji a-ove kedo-an aphan Kepachethang ahut nelong nangdoduntha.

¹⁹Nang dhoromi Arnam, sining an phodamlo; nang kam kethesi klemtang-lo, nangsonthot baduta ave.

²⁰Nephuthak nang kesung lapen keso nangtoilo, bonta nang nephan jakong pithuji, nang nephan tipit pen paheloji.

²¹Aphrang an sose nang nepathemuji, nang nephan ningpangsamthuji.

²²Kumbeleng pen ne nangphan chenamsi nangroji; nang akekroithip ne nangroji, ne Arnam. Ne kumbeleng pen nangphan lunji. Israel Akangthirnei a-Bang.

²³Rot-bom ahut ne ning arong pen nangphan hangji, nening aklong pen ne lunji, pima nang nephan pajok-lo.

²⁴Arni kangthim ne nang dhoromi alam ningje, pima nephan kepasungji kebor-i atum remtang-lo, lapen pinremtang-lo.”