Read Karbi LUN 77 Bible Online

LUN 77 - Karbi bible

LUN 77

¹Ne ase kethe pen Arnam aphan hang-lo, ne kehang asekethe alangli ano chedenlo.

²Ne kesung ahut, HEMPHU aphan ardomlo, neri chirungsi jopangthang ne ardomlo, bonta nening kangsam longlelang.

³Arnam aphan ne kematha ahut, ne mathadingsi kelang ahut, nening bilo.

⁴Alangli nephan jopangthang nemek pajangjelo, ne ke-aini-ong lam ningje un-edet-lo.

⁵Kedamtang arni alam ne chemathadamlo, lapen kedamtang aningkan chemathadamlo.

⁶Mathapik pensi ne ajo pangthang-lo. Ne munthilo, lapen lasonsi nemethang charjulo,

⁷“Ephan HEMPHU kaike e-obupjima laho? Alangli eliphan kaiketa aning ingsamsedet-loma?

⁸La ephan kanghon ingtonkok-loma? La akechechak chebibeloma?

⁹Kangjinsoji Arnam tengneloma? Kangjinso adim la aning kethi tong keplengsetpoma?”

¹⁰Aphi ne pulo, “Nephan nening kepadononei ke, Arnam ajakong chepavedet-tang-lo.”

¹¹Nang thedung akam keklem ne chemathathuji HEMPHU. Kedamtang arni nang keklemtang manghumeme ason ne chemathadamthuji.

¹²Nang keklemtang an aphuthak ne mathathuji, nangjakong akam aputhak ne mathadamthuji.

¹³Nang keklemtang an ason ingthir-et, O Arnam. Nang asonthot badu a-arnamta the-the.

¹⁴Nang ke manghumeme keklem a-Arnam, det-heihei aphan nangjakong paklang-lo.

¹⁵Nangjakong pen nangrat Jakob lapen Joseph asomar aphan pajok-lo.

¹⁶Lang-heihei nangphan thek-long-lote, latum pherelo, O Arnam, lapen talo aklongta kephere klemhurlo.

¹⁷Inghun arve pajang-lo, sining angsong sining ingderlo; lapen bithe-bitha sining birlak-lo.

¹⁸Sining kangder kong-long-lo, lapen sining kebirlak pirthe pathe-ang-lo; pirthe klemhursi chehijuk-lo.

¹⁹Nang lang adihu athak damlo, nang talo karnuk hatpet-lo, bonta nangkengbot thek-longledet-lo.

²⁰Nangrat aso aphan kevi abang asonsi jalo, laso along Moses lapen Aaron si pachepa HEMPHU lo.