Read Karbi LUN 78 Bible Online

LUN 78 - Karbi bible

LUN 78

¹Nerat atum nekethan arjutha, lapen ne kepu alam ano chedentha.

²Ne kere atum alamsi ningjeji, lapen hako pen keplang manghumeme alam than pachiniji.

³Eli karjulongtang lapen kechini alam, ephusar atum ephan ekethan alam.

⁴Esomar atum aphan lahei patu nangnelo; aphi a-ove aphan eli thanlonang, HEMPHU ajakong lapen la thedung akam, Lapen la keklemtang manghumeme akam an.

⁵La Israel arat aphan Aron-heihei pilo, lapen Jakob asomar aphan hukum-heihei pilo. Asomar aphan la aron-heihei pachethantoijisi la aphusar atum aphan pinkhat-lo.

⁶Anke lahei aphi a-ove atum charlipo, lapen halatum asomar atum aphan chethanpo.

⁷Lasonsi latum Arnam aphan chikipo, lapen la keklemtang an ason tengnenelo, bonta la ahukum-heihei ke arnivang kroiverpo.

⁸Latum aphusar atum ason plangpledetpo, kethurkrap lapen kekroikre arat, latum kechiki Arnam along chepathirthe lapen laphan kroithipthe.

⁹Ephraim aso atum thai lapen thai aso-heihei pen cheparisimlo, lapen ron kechedan arni kat-lo.

¹⁰Latum Arnam pen akechechak chebibe la Aron latum kroimolo.

¹¹La kopi klemtang-loma latum tengnetang-lo, latum kethek-long manghumeme akam an tengnelo.

¹²Ijip adet Zoan aklam ajo, Arnam manghumeme ason keklem ahut, Latum aphusar atum thekdunlong-lo,

¹³La talo phlaksi latum aphan lang angbong ponlo, arpong asonsi alangli lang-heihei parjapsomlo.

¹⁴Inghun pen la anerlo latum aphan jalo, lapen me akar pen ajo jalo.

¹⁵Kejejangtang ajo la arlong-heihei phlaksi latum aphan aklong pen lang pilo.

¹⁶Arlong pen la lang pachonlo, lapen langroi asonsi lang palilo.

¹⁷Bonta latum kangtuinei Arnam abe thursi pap klembomlo.

¹⁸Latum aphong aphong Arnam aphan, latum kenangji a-an kehang pen ajok asat lang-lo.

¹⁹Arnam abe thursi latum ningjelo, “Kejejangtang ajo Arnam an pador unjima?

²⁰La arlong athak karbu lake ahok-lo, lapen pangbaksi lang palilo, seta la etum aphan him lapen arat aso aphan ok pi unjima?”

²¹La arjulongsi HEMPHU latum aphan aningthihak-lo, me pen arat aso aphan tengkheng-lo, lapen latum aphuthak la aningkethi litbomlo.

²²Pima la aphan latum akekroi avedet-lo, lapen latum aphan la pajok un pu kroikredet-lo.

²³Bonta la sining aphan ningjelo, lapen la anghap kechingpuji ahukum pilo.

²⁴Latum kepachoji aphan, Manna ahim kepaklo pen ajok sining pen latum aphan la an pilo.

²⁵Lasonsi latum sining apherangke atum a-an cholo, lapen latum kenangji ason an Arnam latum aphan pilo.

²⁶La nihang atomon pajaptoilo, lapen la ajakong pen ajok nitur atomon pathurlo.

²⁷lapen la arat aso aphan, vo-heihei langkung asangti amu ke-ongdung ason-an nangpaklolo.

²⁸Lahei mukam angbong chitimchit pehem-heihei akung nangklolo.

²⁹Lasi rat atum cholo lapen ingkrang-lo, latum kenangji ason an Arnam latum aphan pidet-lo.

³⁰Bonta latum aningkehang dordelang, lapen chobomlang;

³¹Arnam latum aphan aning thisi, latum kangtangnei amonit atum aphan, Israel angbong akemenei ariso atum aphan pathilo.

³²La an keklempi anta rat atum pap klembomlang, la manghumeme akam klemvoiphit seta laphan latum chikikelo.

³³Lasi chethe kevang asonsi latum arni alangli pajutdet-lo, lapen latum akai menmen kepavir pen pajutkok-lo.

³⁴Latum angbong ajehak la kepathi ahut, ahin an la anat chiruipo latum aning chiruisi laphan un an ardompo.

³⁵Latum chemathathulo, Arnam ke latum aphan kerai a-Bang-lo latum aphan kerapjisi vangtang-lo.

³⁶Bonta halatum alam an kechobei saide, latum keningje alam an ahokpet kali.

³⁷Laphan latum kroipameme; alangli pen latum kechechak ason an latum kroikre.

³⁸Bonta Arnam ke arat aso aphan chinghon-o, latum apap la diyalo lapen latum aphan la pavirvedet-lo. Ongdung aphong la aningkethi chekhang-lo, Lapen la kesedeng pen chekhang-lo.

³⁹La chemathathulo, latum ok chot, tomon kevangle kehamthudet ason.

⁴⁰Kejejangtang ajo latum batai ko-an la abethur loma, batai ko-an latum alangliphan aning paduk-loma!

⁴¹Aphong aphong latum Arnam aphan asat lang-lo, lapen Israel a-Arnam Kangthir aphan aning pa-oi-lo.

⁴²La ajakongkethe lapen halatum ahotur pen alangli latum aphan kepajok arni latum tengnedet-lo;

⁴³lapen alangli jakong thedung akam, lapen manghumeme akam Ijip adet Zoan aklam along, keklem tengnetang-lo.

⁴⁴Langroi la vi paplang-lo, lapen Ijip asor latum kejunji alang avedet-lo.

⁴⁵Halatum aphan la tuhop ahur lolo, la latum aphan chenek-lo, lapen chongho halatum adet phangnolo.

⁴⁶Halatum asok kepacho-etjisi, lapen ahidi kepavir-etjisi phelong toilo.

⁴⁷Halatum adrakha athe herai pen, lapen halatum a-ingle arong-heihei ar-e-kelok pen pavirlo.

⁴⁸Halatum achainong herai pen lapen pi ahur cheter pen pathilo.

⁴⁹La jasemet kepherememe aningkethi pen, kethi apherangke atum ason nangtoisi latum aphan pasungpik-lo.

⁵⁰La aningkethi chekhangkhe-detsi halatum achethe langledet-lo, bonta latum aphan avur pen pathilo.

⁵¹Ijip kedo-an adontin aso-akleng alangli pathilo.

⁵²Ansi la arat aso aphan kevibang ason jalo, lapen latum aphan kejejangtang ajo japonlo.

⁵³Latum aphan japon pamelo, lapen latum phereredet-lo; bonta latum ahotur aphuthak talo vangsi thuipon voivoilo.

⁵⁴Latum aphan alangli det kangthir vanlo, alangli methang kehai along-heihei anat.

⁵⁵Alangli rat paphrangbom ahut, kedo barim atum an aphan alangli phlung-et-lo. Halatum alongle Israel akhei angbong thak-et-lo. Lapen arat aso aphan hem pilo.

⁵⁶Bonta latum Jakong-kethenei Arnam abe-thurkrap-lo, lapen laphan asat lang-lo.

⁵⁷La ahukum-heihei latum kroikrelo, lapen apo atum ason thurkrapsi kroikrelo, kekurvon athai aso asonsi chiki nodak-lo.

⁵⁸Halatum karchotap adim-heihei pen ajok, latum alangliphan aning pathilo, lapen latum akumlin-heihei pen, alangliphan latum aning pathihak-lo.

⁵⁹La thek-longsi Arnam aningthilo, lasi la arat aphan obup khangjang-lo.

⁶⁰Shiloh along apehem la obup-lo, hadak la etum angbong kedo ahemlo.

⁶¹Kechejok Asinduk hotur atum alangli papon longdet-lo, la alangli ajakong lapen adak-atur angthek-lo.

⁶²La arat methang aphan aning thi-lo, lapen latum aphan hotur arideng pathitoilo.

⁶³Ron along riso atum thinang-lo, lapen okarjang atum penan kedoji abangphu avedet-lo.

⁶⁴Avi bu-si kurusar atum thinang-lo, lapen halatum ahemepi atum aphan pachiru longledet-lo.

⁶⁵Padu HEMPHU amek kejang pen keprang asonsi prang-lo, inut kangtang amonit drakha ahorlang kangri ra, kepringting asonlo la.

⁶⁶La ahotur atum aphan phlungsi, kerem ketherak amahang pachedip-hop-lo.

⁶⁷Bonta la Joseph asomar aphan dengmolo; laphan Ephraim akhei pen ingvaidet-lo.

⁶⁸Alar Judah akhei aphansi alangli ingvailo, lapen Zaion Anglong aphan la kanghonnei anglong-lo.

⁶⁹Hadak alangli Kardomhemthepi kimlo, sining angsong alangli hem ason; la pirthe aphan asonsi alangli pathirlo; kaike aphan doverlo.

⁷⁰Aban David aphan la ingvailo, laphan la kechopan ahidi pen la ponlo;

⁷¹hadaksi la api ahur bilo, lapen laphan alangli Israel arecho pinchong-lo, Arnam arat kevi abang-lo.

⁷²David amethang ale rirepin akechehodai pen halatum aphan lanalo, lapen latum aphan asai pen japonlo.