Read Karbi LUN 80 Bible Online

LUN 80 - Karbi bible

LUN 80

¹Netum aphan nechedanpitha; O Israel aphan kevi a-Bang; arjutha, nang biresak ahur ajalin. Arvengkedo api atum athak anghoi kangni a-Bang.

²Ephraim, Benjamin lapen Manasseh akhei aphan nang cheklangnon. Netum aphan nangjakong paklangnon, Vang-ra netum aphan pajoktha.

³Netum aphan nevanthunon, O Arnam, netum aphan nang kangjinso paklangtha, lapen netum jokpo.

⁴Ko-an ajirkeding, jakongkethenei Arnam, HEMPHU; nangrat aso akardom aputhak ningthibom-jilangma?

⁵Nang netum aphan ning duk si pachotoilo, mekkri-mek-lang aharlung-theposi pajuntoilo.

⁶Netum adet aputhak adung-arei adet atum nang pachedan longseilo, netum ahotur netum aphan nepinremlo.

⁷Netum aphan nevanthunon! Nang kangjinso netum aphan paklangtha, Lapen netum jokpo.

⁸Ijip pen nang drakha arong vanlo, akaprek akhei aphan nang phlung-lo, lapen halatum alongle along nang elo.

⁹La kepachanji aphan nang adim pangthailo; la angkur kechesak arnukpik-lo, lapen adang bithe chesang-lo.

¹⁰La abin pen inglong-heihei kupthip-lo, la aro-heihei kedar arongthepi-heihei aphanta pabin-et-lo.

¹¹La aro-heihei Mediterran a-Talo, lapen Euphratis Aroi kehelo anta ledamlo.

¹²Kopisi nang la akung kung pai kephriloma? Non tovar kehelat atum la adrakha kechonghuji joikepo.

¹³Nampi aphak atum la sak-ilo, lapen marat api atum la cholo.

¹⁴Netum anat nangpangnotha, Jakongkethenei Arnam! Sining pen netum aphan arum nanglangtha, Vang-ra nangrat aphan pajoktha.

¹⁵Nang ke-etang laso adrakha arong, vang-ra pajoknon. Laso adrakha arong aphan nang pathe-olo!

¹⁶La aphuthak ne hotur atum me keidut-lo lapen chorpet-lo; latum aphan ningthira pavir-etnon.

¹⁷Bi-ra rainon nang kangvaitang arat aphan, nang kepangtang akhei aphan.

¹⁸Netum puthot nang pen suiselo; netum aphan pareng-longnon, lapen netum nangphan ropo.

¹⁹Netum aphan nevanthunon, Jakongkethenei Arnam HEMPHU, Nang kangjinso netum aphan paklangtha, Lapen netum jokpo.