Read Karbi LUN 81 Bible Online

LUN 81 - Karbi bible

LUN 81

¹Ekechedanpi Arnam aphan ning arong pen hangjonon, Jakob a-Arnam aphan kero alun lunnon!

²Lun chengnon lapen prakso thipnon; kumbeleng-heihei lapen kumbeleng-chordeng-heihei pen rot pajumenon.

³Chiklo kemi lapen chiklo kepleng ahut, rong-aje aphan pong-ut butnon.

⁴Israel along Aron lahelo, Jakob a-Arnam pen ahukumlo,

⁵Ijip adet la ketengkheng ahut, Alangli la Israel arat aphan pilo. Isi kechininepin ase ne arjulong-lo.

⁶“Nangnung anghor-heihei Ne pondet-lo, nang ita anghor ne nangtum aphan pa-otoilo.

⁷Nang kesung ahut, nangtum nephan nehang-lo, lapen Ne nangpajok-lo. Tomon tipri Ne kechepatu adim pen, nangtum aphan Ne nangthek-long-lo. Meribah alangso along Ne nangtum aphan asat paphotoilo.

⁸Ne kepacheretoi alam anat no chedentha nerat atum; Israel, nang nelam karjuji aphan ne ko-an ninghang-loma?

⁹Nangtum akaprek arnam aphan archochedet nangji.

¹⁰Ne nangtum a-Arnam HEMPHU-lo, Ijip adet pen nangtum aphan nangkevan a-Bang-lo. Nang ingho chingpunon, lapen Ne nangphan nangphinpo.”

¹¹“Bonta nerat atum nelam arjuje, Israel ta nephan kroi ingtungte.

¹²Lasi latum aphan Ne halatum aning kangtang atovar padamlongsi, Latum aningkehang aling paklemlo.

¹³Nerat atum nelam ne arju asonte! Israel aso Netovar dam asonte ko-an akemeji.

¹⁴Anke latum ahotur aphan Ne parem serakji apot-lo, lapen halatum abekethur atum an aphan hai-etji apot-lo.

¹⁵Nephan kehijim atum pheresi Ne ingno angphun patongkiji apot-lo; Halatum aphan kepi aduk kaike doverpo.

¹⁶Bonta nangtum aphan Ne kemenei a-an pacholo, lapen nampi apijo alang pen nangpangkrang-lo.”