Read Karbi LUN 83 Bible Online

LUN 83 - Karbi bible

LUN 83

¹O Arnam, dojoirinon; dothingri, ningjejepinri!

²Langtha! Nanghotur atum thurkrap-lo. Lapen nangphan kehijim atum an thurkrap-lo.

³Nangrat atum abe thursi latum bidi-kanglim mang-lo; nang kerai atum aphan avi kepabujisi latum thurlo.

⁴“Vangnon,” latum chehang-lo, “Halatum adet etum pavirdet-lonang, anke Israel aphan kaiketa tengnebuppo.”

⁵Latum akemang latum chingripet lapen nangbe thursi chelangpet-lo.

⁶Edom lapen Ishmael arat aso atum Moab lapen Hagri arat aso atum;

⁷Gebal, Ammon lapen Amalek, Philistia lapen Tair arat atum.

⁸Lot asomar Ammon, lapen Moab aso atum along, Assiria atumta chelangdunsi pangtang-muchot-lo.

⁹Midianan atum aphan nang keklem asonthot latum aphan nang klemnon, lapen Siria, Jabin lapen Kishon Aroi along keklem asonthot klemnon.

¹⁰Nang latum aphan Endor along paremlo, lapen latum abang arpum-heihei longle athak thuvok-lo.

¹¹Oreb lapen Zeeb atum aphan, nang keklem asonthot halatum ajalin aphan klemnon; Zebah lapen Zalmunna aphan, nang keklem asonthot halatum kedo-an pangribang atum aphan paremnon.

¹²Latum pulo, “Arnam kechepahemphu along, etum emethang aphan cheraidet-lonang.”

¹³Aduk ason O Arnam, sokpun ason, tomon kepangjarpon ason latum aphan papratseinon.

¹⁴Nampi me kecho ason, inglong athak me ade kethur ason.

¹⁵Nang tomon tipri pen latum aphan phlungnon, lapen nangning kethi atomon pen latum aphan paphere-phratnon.

¹⁶Ketherak-le latum amahang pachedip-hop-lonang, O HEMPHU, lapen latum nangjakong pachininon.

¹⁷Latum remdet-ra kaike aphan pacherever-lonang, kelangrem penle latum pathi-et-lonang.

¹⁸Nang inutvetsi HEMPHU, pirthe adang kepangri a-Bang, pu latum pachininang.