Read Karbi LUN 84 Bible Online

LUN 84 - Karbi bible

LUN 84

¹Nang Kardomhemthepi aphan ne ko-an chinghonlo, Jakongkethenei HEMPHU!

²Ne ko-an hadak kedo ingtung-loma, HEMPHU a-Kardomhemthepi arlo kedoji nening hang-lo. Kereng-et Arnam aphan nening aklong pen ne nening arong alun lunji.

³Vo-chet atum seta atar chekimlo, vothaiso atum ahem dolo; halatum asomar nang dovan adungsi chebilo, Jakongkethe HEMPHU, ne recho lapen ne-Arnam.

⁴Nang Kardomhemthepi arlo kedo atum ko-an rengme, kaiketa nangphan kero alun lunlo.

⁵Nang pen jakong kelong atum ko-an rengme, latum Zaion Anglong dhorom akam kedamji aninghang-lo.

⁶Halatum Baka Arlok kekreng ajo kedam ahut, la isi langkangbop-heihei adim plang-lo; Barla kejut a-arve la alangteng papleng-lo.

⁷Latum athak latum arnam-heihei a-Arnam aphan thek-longpo.

⁸Ne kardom arjutha Jakongkethe Arnam, HEMPHU; arjutha O Jakob a-Arnam!

⁹Netum arecho aphan pahirjumetha O Arnam, nang kangvaitang arecho aphan.

¹⁰Bithe-bitha ni suri kedo, mate nang Kardomhemthepi arlo arnisi kedolong memu; kehingno atum ahem kedo apar, ne Arnam ahem anghap along, ne arjap-rongji.

¹¹HEMPHU ke ekerai a-Bang, lapen adak-atur arecholo, kangjinso lapen man pen epahirjumelo. La kopima akeme keklem atum aphan akeme amar kepiji mome.

¹²Jakongkethe HEMPHU, nangphan kechiki atum ko-an akeme!