Read Karbi LUN 86 Bible Online

LUN 86 - Karbi bible

LUN 86

¹Nephan no chedentha HEMPHU, lapen nethaktha, pima ne kerap longle lapen jakong ave.

²Kethi pen nepajoktha, pima ne nangphan kroiverlo; nepajoktha, pima ne nangbanlo lapen ne nangphan chikilo.

³Nang ne-Arnam, lasi nephan ingjinsotha; nerlosoni nangphansi ne ardomlo.

⁴Nangban aphan pachehok-longtha, O HEMPHU, pima ne kardom nanglongsi damlo.

⁵Nang netum aphan mesen lapen diyabom, nangphan kardom an aphan nang kechemitme akanghon pensi plengset.

⁶No chedentha, HEMPHU, ne kardom anat; ne kerap kehang akar-em arjutha.

⁷Ne kesung ahut nangphansi hang-lo, pima nang ne kardom-heihei thak-lo.

⁸Nang sonthot Arnam nahokta ave, O HEMPHU; nang keklemtang ason inutbakta klemklelang.

⁹Nang kepinchong akhei an, nanglong vangsi nangphan ardom nangji; latum nangnong pathepo.

¹⁰Nangjakong thepik, lapen manghumeme akam-heihei klem, nang inutvetsi Arnamchot.

¹¹Nethantha, HEMPHU; ne kopi klem nangjima lapen nangphan ne kroithippo; nening aklong pen chinghonsi nangphan ingduk thekjile nethannon.

¹²Nening kedo-an pen ne nangphan nangropo, O HEMPHU, ne Arnam; Ne kaiketa nangnong pachethangpo,

¹³Nephan nang kechemitmepin akanghon ko-an kethe! Nang nephan tipit pen pajok-lo.

¹⁴Anekethe amonit atum nebethursi vang-lo, O Arnam; aning kesedeng asong ne kepathiji bor-ilo, latum nangphan ano chevarve.

¹⁵Bonta nang, O HEMPHU, kangjinsosi plengset lapen kanghon Arnam, kaiketa ningding-o, kaiketa ingjinso lapen kroithirklong.

¹⁶Nenat nang chetevartha lapen nephuthak ingjinsotha, ne pangtangra nepajoktha, pima nepei asonthot ne nangphan ingduk-lo.

¹⁷Nang kechingkeme angthek ne paklangtha, HEMPHU; nephan kehijim atum nang nephan, ningkangsam lapen kerap thek-longsi nephan kehijim atum therakpo.