Read Karbi LUN 89 Bible Online

LUN 89 - Karbi bible

LUN 89

¹O HEMPHU, nang chemitme kanghon apot ne kaike lunverji; nang kekroithirklong alam ne a-ove-ove kaike pachethangji.

²Ne chini nang kanghonsi kaike apor seta doverji, nang kekroithirklong inghun asining asonsi doverji.

³Nang pulo, “Ne kangvaitang amonit pen ne Kechejok Aloh pathirlo; neban David aphan Ne chechak-lo,

⁴‘Nangso-nangsu si kaiketa recho cholongverpo,’”

⁵Nang manghumeme akam keklem apot sining-heihei lunlo, Kangthir atum nang akekroithirklong pusi hangjolo HEMPHU.

⁶Nangsonthot sining baduta ave HEMPHU, sining asor baduta nang pen chingbarbe.

⁷Kangthir atum amei along nangphan pherelo; lapen latum kadokave nangphan pheresi arjapphrong-lo.

⁸Jakongkethe HEMPHU Arnam, nangsonthot jakongkethe avelo; asontin alongta nangke kekroithirklong O HEMPHU.

⁹Jakongthepik a-Talo aputhak nang pangrilo, la aningkethi adihu nang pahamlo.

¹⁰Rahab alang api aphan nang arburop-lo, lapen laphan pathilot-lo. Nang kangtang ajakong pen nang hotur aphan nang paremdet-lo.

¹¹Sining-heihei ta, pirthe ta nangmarlo; pirthe lapen la along kedo amar an nangsi pinchong-lo.

¹²Nirep lapen Nitur nangsi pinchong-lo, Tabor Anglong lapen Harmon Anglong aning arongsi nangphan lunlo.

¹³Nang ingtangpik! Nangjakong thepik!

¹⁴Nang recho arat dhoromi akam, lapen ahok akangsai aputhaksi pathirlo, nang keklem along an kanghon, lapen kekroithirklong paklang-lo.

¹⁵Lun pen nangphan karcho arat atum ko-an rengme, latum nang akangjinso akethe-ang dolo!

¹⁶Nang pen apotsi latum narlosini aning cheparong-lo, lapen nang kechingkime apotsi latum nangphan rolo.

¹⁷Nang netum aphan thedung akehai pilo, nang kanghon pensi netum aphan nang pahaidet-lo.

¹⁸Nangsi HEMPHU, netum aphan kerai abang ingvailo; nangsi Israel a-Kangthir Arnam, netum aphan netum arecho pilo.

¹⁹Hako ahut kekroithirklong nangban atum aphan, pathek-longsi nang pulo, “Anong kechethang aron-aso aphan Ne kerap pilo; rat pen inut ingvaisi recho anghoi ne pitang-lo.

²⁰Kangthir ajangthu patipsi neban David aphan recho battang-lo.

²¹La along nejakong doverpo, nejakong laphan pangtangpo.

²²La ahotur atum la abe thur seta kaita kam chunchedetpo, kehingno atum laphan parem-une-detji.

²³La ahotur aphan Ne paropji, lapen laphan kehijim abangphutin aphan Ne pathi-etji.

²⁴Laphan Ne chinghonji lapen klempiji; laphan ne kaita pahaiverji.

²⁵La adet Ne patheji, Mediterran a-Talo pen Euphratis Aroi an.”

²⁶La nephan pulo, “Nang nepolo lapen ne-Arnamlo; nang ne-Rai a-Bang lapen nepajok a-Bang-lo.”

²⁷Laphan neso akleng pinchongpo, recho atum kedo-an angbong aketheneilo.

²⁸Laphan Ne kechak an klempipo, la pen Ne Kechejok Aloh kaike doverpo.

²⁹Inghun a-sining asonsi la aro thirthip-po; la aso-asu recho cholongverpo.

³⁰“Bonta la asomar atum jongsi Ne Ron kroikre lote, lapen Ne hukum-heihei ateng dode pulote,

³¹jongsi latum Ne kepinkhat arjuje pulote, lapen Ne hukum-heihei rimre pulote,

³²Latum apap-heihei apot Ne latum aphan aduk pipo, latum kechokche-heihei apot Ne latum aphan kesung pachechakpo.

³³Bonta David aphan kanghon Ne, mate laphan kechak ason pachemitme.

³⁴Alangli pen Kechejok Aloh Ne phriphre, mate laphan kechak ason esonnatta che-endetdelo.”

³⁵“Kaike aphan Ne men Kangthir pen, kechak ason an Ne David aphan kaike seta pachobeibelo.

³⁶La kai seta aso-asu doverpo, arni atur dotik an la adet langcharibompo.

³⁷La chiklopi ason thirthip-po, lapen kekroithirklong ahaki ke inghun asining helo.”

³⁸Bonta nang kangvaitang arecho aphan nangning thi-lo, laphan nang turchorsi dengmolo.

³⁹Nangban pen nang Kechejok Aloh chephridak-lo, lapen la recho aphutup inghan ajo varchorlo.

⁴⁰La arongsopi apaisong-heihei phri-et-lo, lapen la paikomchen ahem parusi o-tekang-lo.

⁴¹Dampri-dampro atum la amar chonghuponlo, la tebok-terei kedo-an laphan ingnekchoilo.

⁴²La ahotur aphan nang pahaidet-lo, nang halatum aphan pachehok-lo.

⁴³La arisim-heihei do pajoinak-lo, lapen ron along laphan paremdet-lo.

⁴⁴La recho achin nang pondet-lo, lapen la recho anghoi longle athak pakrep-lo.

⁴⁵La apor nanglele aphrang laphan pasar-eng-lo, lapen kelangrempen laphan dipthip-lo.

⁴⁶HEMPHU, nang kaike chepatu verpoma? Me ason ni ko-ansi nangning kethi karpoma?

⁴⁷Chemathatha, nekai ko-an akethih loma; chemathatha, nang netum kedo-an aphan kepinchong ok-chot!

⁴⁸Komatsi rengverpo lapen thithedet poma? Monit atum kopusonsi tipit pen chepahelo thekpoma?

⁴⁹HEMPHU, aphrang nang kanghon angthek konat-lo? David aphan nang kechak ason konat-lo?

⁵⁰Ne nangban aphan kosonsi nelangremloma tengneri, kekroikre atum ahirjuno an ne ko-ansi charjunang loma.

⁵¹Nang kangvaitang arecho aphan, nang hotur atum pinremlo, O HEMPHU! La kedam aling laphan latum pinremlo.

⁵²HEMPHU aphan kaike rovernang! Amen! Amen!