Read Karbi LUN 9 Bible Online

LUN 9 - Karbi bible

LUN 9

¹O HEMPHU, nejakong kedo-an pen, ne nangphan ropo. Nang manghumeme akam an ne pachethangpo,

²Nang ajok ne ning arong pen lunpo, kero alun ne nangphan lunpo, Jakongkethenei Arnam.

³Nang nangcheklang-lote, nehotur atum chiruilo, latum krepsi thipo.

⁴Nang kangsai mesen lapen ahokpet, lapen nang nephan raisi ingsailo.

⁵Kekroikre atum aphan nang khindelo, kehingno aphan nang pavirlo, latum aphan chemathathuthelo.

⁶Netum ahotur atum kaike aphan juttang-lo, latum arongsopi-heihei nang pavirlo, lapen lahei tengnetang-lo.

⁷Bonta HEMPHU ke kaike aphan arecholo, kangsaijisi la anghoi pathirtang-lo.

⁸La pirthe dhoromi pen pangrilo; la det-heihei aphan ahok akangsai pen ingsailo.

⁹HEMPHU ke kechenek kepho abang achong-lo, kesung ahut isi kejok adimlo.

¹⁰Nangphan kechini atum HEMPHU, nangphan chikipo; nanglong kevang abangphutin aphan nang o-e.

¹¹HEMPHU aphan kero alun lunnon, Alangli Zaion pangrilo! La keklem ason an adettin aphan thannon!

¹²Kesung kepho atum aphan Arnam chematha, halatum akerchiru alangli tengnene, lapen latum aphan kechokche akam, kepaklem atum aphan la adukpilo.

¹³Nephan ingjinsotha, O HEMPHU! Ne hotur atum nekepasung nelangtha!

¹⁴Kethi pen nephan nepajoktha, O HEMPHU, anke ne Jerusalem arat angno arjap unpo! Lapen ne nangphan kechoro-i athe an latum aphan than-etpo. Nang nephan kepajok apot nening cheparongji.

¹⁵Kekroikre atum hilik hutpo, lapen jangchokpo, latum amethang apham along chedanchekpo.

¹⁶HEMPHU dhoromi akangsai pen la amethang chepaklang-lo, lapen kehingno atum amethang keklem apham pen chedanlingpo.

¹⁷Kehingno atum an kejut ke kethi helo, Arnam aphan kedengde atum antalo.

¹⁸Keboi atum aphan kaiketa langpo, keduk atum aningkethe kaike aphan pavirvedetpo.

¹⁹Vangnon, HEMPHU! Latum nangphan pakroimolongri! Nang ingno kekroikre atum, Lapen halatum aphuthak ingsainon.

²⁰Latum aphan papherenon, O HEMPHU; latum kethinangji amar pu latum aphan pachininon.