Read Karbi LUN 90 Bible Online

LUN 90 - Karbi bible

LUN 90

¹O HEMPHU, nangsi a-ove a-ove penta netum kedo-i adim cheplangtang-lo,

²Inglong-heihei thipthe ako, mate pirthe lapen longle plangple ako; nangsi jutjepin akai penta Arnam, lapen Arnam plangverpo.

³Monit aphan nang aphrang la keplangcheng asonthot laphan longle aduk pachevoithutoilo, lapen pulo, “O Monit aso, chevoithunon!”

⁴Ningkan suri isi ke nangphan arnisi ason, halahei atumi ben ason damtang-lo, ajo epor ason ben si thihek.

⁵Nang netum aphan langthepi kepon asonsi ponlo, netum mang keheman pen apar ajir dingdedet-lo. Netum adap kechingjok abap asonlo.

⁶La thesi pangpharpo, anke krenghaksi arnikangsam chekedupo.

⁷Nangning kethi pensi netum aphan pavirlo, nangning kethi akup netum pherepik-lo.

⁸Nang ingnosi netum apap lansarlo, netum kepatu apap-heihei hadak Nang thek-long-et.

⁹Nangning thisi netum achethe pathihek-lo, kepalamso asonsi la avetang-lo.

¹⁰Ningkan throksi kep si netum reng-longchot, ingtangmuchot pulote, ningkan throknerkep an; seta lahei ke kedo-an kesung lapen keningri-nangjiloksi vanlo. Chethe jutdapprangsi netum dambomlo.

¹¹Komatsi nangning kethi ajakong mathaloma? Nangning kesedeng pheresi pine cheplangpo pu chiniloma?

¹²Netum achethe thihek pu nethantha, ansi netum cherethekpo.

¹³Vangthutha, O HEMPHU! Ni ko-ansi nangning thipoma? O HEMPHU, nangban atum aphuthak ingjinsotha!

¹⁴Nang chemitme akanghon penle, netum aphan adapvangta paplengset tha, netum lun lunpo lapen netum akai rengtik an chehok-longpo.

¹⁵Netum kesung kephonang aningkan, lapen nang netum aphan ko-an ningpaduk-loma; la an le nang netum aphan ning arong pinon.

¹⁶Nangban atum nang jakongkethe-heihei akam pathek-longtha; nesomar atum aphan nangdak-nangtur ajakong pathek-longtha.

¹⁷HEMPHU netum a-Arnam, nangli ahirjume nelitum along padonang. Netum keklem ason an pachunlongtha!