Read Karbi LUN 94 Bible Online

LUN 94 - Karbi bible

LUN 94

¹HEMPHU nangke aduk kepi a-Arnam; Nangning kethi chepaklangtha!

²Monit kedo-an aphan nangke kangsai a-Bang-lo, thurra anekethe atum kephonangji ason pinon!

³Ni ko-ansi kehingno atum chehok-long poma ko-an ajirdingjima HEMPHU?

⁴Pran-karmut atum ni ko-ansi ane chepathepo, lapen halatum avi kepabu aputhak chepindak-ver poma?

⁵Latum nangrat aphan pangjelo, HEMPHU; nangrideng kedo atum aphan latum chenek-lo.

⁶Heme jangreng aphan latum pathilo, lapen netum adet kedo bang adet aso aphan apran armut-lo.

⁷Latum pulo, “HEMPHU etum aphan ethek-longle; Israel a-arnam elangle.”

⁸Ne rat atum, nangtum la an akunkave, kejok-lu langma? Komantusi nangtum kecharlipo.

⁹Arnam eno-heihei epinchong-lo, la pen arjulonglema? Alangli emek epinchong-lo, la pen thek-longlema?

¹⁰La khei atum aphan ingchek-lo, latum aphan la aduk pipema? Alangli helo monit kedo-an athanbang-lo, La kethek avema?

¹¹Latum kopima kematha HEMPHU chini; latum thangta kalidet akematha la chini.

¹²HEMPHU nang kepinkhat abangphu ko-an rengme, halaphan nang hukum thanlo!

¹³Kehingno abang aphan, alar huilongletik nang laphan kesung arni pen seta pasanglong-lo.

¹⁴HEMPHU arat aphan o-e, la arideng kedo atum an aphan la turchorche.

¹⁵Kangsai adim-heihei puthot ahok-akangsai longthuji, lapen kadokave dhoromi atum la cheto dunpo.

¹⁶Kehingno abe thursi nephan komatsi arjappo? Kehingno keklem thursi nebe komatsi nangdunpo?

¹⁷HEMPHU jongsi nephan nerap-re pulote, kedojoi adetsi ne damserakji apot-lo.

¹⁸Ne pulo, “Ne kreptang-lo,” bonta nang chemitme akanghonsi, nephan ne-ot-thip-lo, O HEMPHU.

¹⁹Nening kesiksak lapen keningri ahut, nang nephan ning pangsamlo, lapen pachehok-lo.

²⁰Kechopap akangsai atum pen nang thang akam ave, latum ahok-he akangsai pahok-lo,

²¹Latum keme amonit aphan kepathiji mang-lo, lapen adai kave aphan kethinangji ahukum pilo.

²²Bonta HEMPHU ne chedanpilo; ne-Arnam nerailo.

²³Halatum kehingno apot, la halatum aphan aduk pilo, lapen halatum apap apot pavirlo, netum a-Arnam HEMPHU si latum aphan pavir-etpo.