Read Karbi SARLAMTHE 1 Bible Online

SARLAMTHE 1 - Karbi bible

SARLAMTHE 1

¹David asopo lapen Israel arecho, Solomon asarlamthe.

²Ladak bidi lapen mesen kepare, lapen athe karsik pen kechinidam kepu asarlamthe-heihei kepangthek-thekji aphan akerap lahelo.

³Lahei nang kosonsi reset pen lapen ang-thikdut, ahokpet, lapen mesen pen kedothekji aphan nangthanpo.

⁴Lahei kethekthe pin abangphu aphan pareset un lapen risomar aphan kedorphlup atiri paplangthek.

⁵Lahei asarlamthe reset abangphan gian bat lapen loh kethek abangphan ja thek,

⁶lasi latum sarlamthe kepatu athe karsik alam lapen kereset amonit atum karju akesungkrung alam-heihei chini unpo.

⁷HEMPHU aphan kephere helo gian kecheng; bonta kelu atum bidi lapen kepinkhat alam dengde.

⁸Sopo, nangpo lapen nangpei nang-kepu alam arjutu.

⁹Halatum kethan alam kemesen apoho mate lek-asang nang arje kelar asonsi nang-ot nangdur pamesenpo.

¹⁰Sopo, papi atum nangphan asat nangpaklo ahut,

¹¹Halatum jongsi, “Vangnon; inutbak amonit kepathi-jile rilonang! Adai-kave abang aphan pathira la arong lang-lonang!

¹²Halatum aphan eli kelong ahut, reng-et tahai, bonta etum damlote, latum kethilo!

¹³Ason ason akhi eli longpo lapen ehem kethipon amar pen plengsetpo!

¹⁴Vangnon lapen netum along nangchelang-dunnon, lapen eli kanghutang amar an chethak-longpo,” pu pulote kroidunri.

¹⁵Sopo, lason amonit atum along dunri. Halatum pen chepahelonon.

¹⁶Pine kehingno keklemji aphan latum inghong un-e. Latum kaita kepathiji aphan chesikverlo.

¹⁷Nang kenepji nangning kehang avoso jongsi nangthek-long paphrang pulote, laphan lan sang seta thang ale ave,

¹⁸bonta halatum ason monit atum amethang aphansi pham chetot-lo, laso apham pensi latum thinangpo.

¹⁹Kethiparohum amar kaita kethipon abangphu apran hang-lo lake kephangno akam keklem abangphutin aphan lason plang-lo.

²⁰Arjutha! Tovarpi-heihei lapen hithi adim-heihei along bidi hangkong-lo,

²¹rongsopi anghap-heihei along, lapen rat atum kevangpet adim along asekethe pen hangkongsi pulo.

²²Kelu arat! Nangtum ni ko-ansi chepaluver poma? Gian aputhak nangtum ni ko-ansi pinrempoma? Nangtum kaita charliledet poma?

²³Ne nangphan nang kangchek ahut, nangno chedennon; nangtum aphan Ne nangparepamepo lapen ne gian nangtum aphan nang thakpo.

²⁴Ne nangtum aphan nanghangbomlo, nangtum kevangji aphanlo, bonta nangtum ne arjudunde. Nangtum nephan nangno chedendedet-lo.

²⁵Ne kepare an nangtum dengdelo, lapen ne nangtum aphan kepakengji alam nangning hanghelo.

²⁶Lasi nangtum sung-lote, ne nang ingnekchoipo. Kepherememe nangtum aputhak vang-lote, ne nang chongthui-rongpo.

²⁷La tomonpi ason nangputhak vang-lote, kepherememe atomonpi vang-lote lapen nangtum sopiksi sungpo.

²⁸Anke nangtum bidi aphan hangpo, bonta ne nang thakthe detpo. Alongtinta nangtum nephan nangri tahai, bonta nangtum nephan nanglonglelo.

²⁹Nangtum kaita gian rimre lapen kaike HEMPHU aphan kroimolo.

³⁰Ne kepare nangtum kaita rirelo mate ne nang pakeng ahut, nangno chevarve.

³¹Lasi, nang kelongji asonsi nang longchotpo, lapen nang methang akam si nangphan nangphu pasopo.

³²Kethekthe amonit atum thi, pima latum bidi dengmolo. Kelu atum amethangsi kerire apot virlo.

³³Bonta nelam karju aling abang ke jokvanji. Alangli jokji, thangnat asonta pherejok phlotji.