Read Karbi SARLAMTHE 10 Bible Online

SARLAMTHE 10 - Karbi bible

SARLAMTHE 10

¹Solomon asarlamthe ajehak do, lahei ke Solomon asarlamthelo. Inut kereset asopo apo aphan aning-parong, Bonta keluvok aso apei aphan ning keduksi vanpi.

²Kechobei pen kelong akhi nangliphan thangnat akeme klemkle, bonta kechepadukpik pensi nanglikai jokji.

³Kemesen amonit atum aphan HEMPHU pangchir longle, bonta kehingno abangphan halatum akenang pen Alangli khang.

⁴Keseletsi nanglitum aphan paduk-po, bonta kam keklem chepaduk lote nangli plangpo.

⁵Inut kemathathek abang sok kerot apor ahut sok pangrum, sok kerot ahut amek kejang abang ke tam abanvak-lo.

⁶Inut kemesen amonit abang ahirjume longji, inut kehingno amonit alam along kevir alam patulo.

⁷Kemesen amonit aphan isi ahirjume asonsi chemathadam, bonta kehingno abangphan tengne dapprangpo.

⁸Kemathathek abang kemesen kepare alam deng, seta kelu alam keningjetap abang virkokji.

⁹Athikpet amonit atum jokvan lapen damvang, bonta thikpetpe abang aphan nepchekpo.

¹⁰Mane abang jongsi ahok alam patujoi lote kesung paman, bonta lam keningjedak abang ningkangsam aphan paklem.

¹¹Kemesen amonit alam lake chethe atirilo, bonta kehingno abang alam along kehingno a-ot patu.

¹²Kepasungji kechorung akam hijimnon, bonta adai an aphan kanghonsi dip-lo.

¹³Kereset amonit atum keningje alam athe rotdut, bonta kelu abang-phan aduk pi nangji.

¹⁴Kereset abang latum un an agian pangrumji, bonta kelu abang lam ningje lote kesungji helolelo.

¹⁵Akhi-adat keplang abangphan rai, bonta kecholonglesi keduk abangphan pavir.

¹⁶Kemesen akam anong-e-ke che-thelo, bonta pap ke pap ke-ongmuchot anatsi eja.

¹⁷Kepakeng alam karju abang rengji, bonta kechokche kechekrongkre abang ke kesung phovek.

¹⁸Jongsi inut kehijim ason keche-patu abang ke chobei abang-lo, Lapen chethan-palamso alam pachetak abang ke kelu abang-lo.

¹⁹Lam ningjepik lote akelet dovekji, Nangli jongsi kereset abang pulote nangli dojoiji.

²⁰Kemesen amonit atum alam ke ajukave arup ason, kehingno abang akemunthidam ke thangnat ale ave.

²¹Inut kemesen amonit alam ke ongdung atum aphan ale pado, bonta nangli nanglimethang akeningje thekthe pen chepathithek.

²²Nangli keplanglong ke HEMPHU ahirjume penlo, Alangli la along thangnatta ningduk jokdundelo; kam keklem chepaduk-ot pen nangli plang-o-thekthe .

²³Kechokche akam along ning chepa-rongchot ke isi akelulo, Kereset abang ke bidi akam alongsi ning cheparong.

²⁴Dhoromi atum kenangji ason an long, bonta kehingno abang ke latum kepherenei ason si longpo.

²⁵Tomonthepi vangpo, lapen kehingno atum aphan japponphitpo, bonta athikpet atum kaiketa jokvanji.

²⁶Keselet amonit nangliphan eson akam kepachunji aphan longle, la nang ingho kethorchir asonsi oipoi-lakpo, mate nangli mek mehi kechek asonpo.

²⁷HEMPHU aphan kroinon, anke nangli chethe dingpo, kehingno abang ke kethi apor nanglele ako thilotpo.

²⁸Kemesen amonit atum aning kechethe ke aning-arong anatsi damji, bonta kehingno amonit atum thangnat kali anatsi cholangdingpo.

²⁹Athikpet atum aphan HEMPHU rai, bonta kehingno akam keklem atum aphan pavirlo.

³⁰Dhoromi atum kaike jokvan longji, bonta kehingno abang det along dolongledetji.

³¹Dhoromi amonit atum gian alam ningje, bonta lamjuno keningje angho inghip-hetpo.

³²Dhoromi amonit atum kangjinso alam keningje nangji chini, bonta kehingno atum ning-pa-oilak alamsi ningje.