Read Karbi SARLAMTHE 11 Bible Online

SARLAMTHE 11 - Karbi bible

SARLAMTHE 11

¹Kechobei alin-heihei kerim abangphan HEMPHU hijim. Athik pen kelin Alangli aningdok-lo.

²Anekethe abangphan langrem dapprangpo. Asotdut pen kedosi kere-muchot-lo.

³Nangli jongsi mesen pulote, nangliphan athikpetsi nangjalo. Kechi-kinodak amonit ke halatum methang athikthe si pavirpo.

⁴Kethi nang kechetong arni keplang-kephi nangphan thangta nang-rap-re, bonta athikpetsi nangchethe nangpajokpo.

⁵Athikpet kedo mesen abang akai pajoi muchot po, bonta kehingno abang amethang aphansi chepakrep po.

⁶Dhoromi akam si angthikdut abang-phan pajokpo, bonta kechikinodak abangphan amethang akehung pensi chedanpo.

⁷Kehingno abang thilote, la aning kechethe ta thi dunpo. Akhi-adat aputhak aning kechethe thangta kalidetji.

⁸Dhoromi aphan kesung pen rai-detji; la akesung kehingno abang alongsi vangthurong po.

⁹Arnamkave atum alam pen ajok adung aphan pavirlo, bonta gian pen dhoromi abang jok-lo.

¹⁰Angthikdut atum akopai mesen lote rongsopi chehok-lo, lapen kehingno abang thilote kechehok-i akehangjo doji.

¹¹Dhoromi atum ahirjume kepi pen rongsopi thelo, bonta kehingno atum pen rongsopi pavirlo.

¹²Tebok abang aphan kehijim abang thangnat-ta chenine; bonta kematha thekser abang ke dojoiji.

¹³Anongkejo abangphan baduta kepatu nangji alam chiki-i-no, bonta kechiki klong atheng abangphan nangningchethe un.

¹⁴Kethan parebang avete isi adet virdetji. Keparebang do-ong akejokvan long-ong.

¹⁵Nang jongsi kechinine abang apreng ketuji chechak-lote nangning che-oiji. Nang kechepahelo dunsi akeme.

¹⁶Kangjinsothek a-arloso anong jume, bonta a-otkeme kavepin a-arloso abangphan langremlo. Inut keselet abang tangka kaita ave, bonta kecheting-phrat abang plangji.

¹⁷Nang ingjinsothek lote nangme-thang aphan mesen. Nang jongsi sedengkak lote nangmethangsi chephangno.

¹⁸Kehingno atum ahokpet pen kelang ave, bonta kopisi akechok la nang klemlote, nangphan nong-e nangpivekji.

¹⁹Badutame akeme ason keklemji mathathip lote rengji, bonta badutame kechokche akam klembom pulote thiji.

²⁰Aning kehingno amonit aphan HEMPHU hijimlo, bonta akechok keklem abangphan chinghon.

²¹Nang mathakoi-tame kehingno abangphan aduk pivekji, bonta dhoromi abang jokphlotji.

²²Akeme akangsai kave a-arloso a-arje kelangme dochot lake phak angtur along kedo ser anorik asonlo.

²³Kemesen atum aningkehang kaita mesen; kehingno atum aningkehang ateng lang-lote, abangphutin ta aningthi .

²⁴Ajehak atum tangka chereresi padamlo seta plangthubom. Akaprek atum chere-o seta dukthumuchot.

²⁵Chingchomri, lapen nang plangpo. Bang aphan rapnon lapen nangphanta rapdetpo.

²⁶Sok Khangsi ador ke-ong aphan kechonghong abangphan rat hirjuno pilo, bonta kejorji aphan kebi abangphan latum roji.

²⁷Nang akemang jongsi mesen pulote, nangphan man piji, bonta nang kesung cholangrong pulote lasi nang longpo.

²⁸Amethang akhi aphan kechiki abang chungphang-ok ahut keklo athengpi arvo asonpo, bonta dhoromi atum barla athengpi arvo ason chingthurpo.

²⁹Ahemtun aphan kesung kevan abang kejut thangta avedetji. Kelu atum ke kaita kere atum aban plangji.

³⁰Dhoromi athe ke chethe athengpi lo, bonta kechebohong keturlur ke la chepondetpo lapen karjong kevanthek ke kereset abang-lo.

³¹Pirthe athak kemesen atum aphan nong-e piji, lasi kehingno abangphan ke aduk pivekji pura matha tamelo.