Read Karbi SARLAMTHE 12 Bible Online

SARLAMTHE 12 - Karbi bible

SARLAMTHE 12

¹Gian aning kedok abang la kechokche ahut laphan pakeng-long. Kelu atum ke kepakeng hijimlo.

²Kemesen amonit aphan HEMPHU aningdok-lo, bonta kehingno kemang abangphan khindelo.

³Kehingno akam kejokvan pi thekthe, bonta dhoromi atum arjap pathirklong.

⁴Kemesen apiso ke apenan anong lapen ning arong vanpi; bonta ketherak kevan a-arloso ke apenan areppi arlo kensar akeso asonlo.

⁵Angthikdut atum nangphan langpa-meji; kehingno abang nangpachobei-jisi aning hangji.

⁶Kehingno abang alam pathilo, bonta dhoromi abang alam kether kepho aphan pajok.

⁷Kehingno atum latum akevir chetongji, lapen aso-asu pamotekang longledetji, bonta dhoromi ahem asor rengbomji.

⁸Nang jongsi repik, nangphan roji; nang jongsi luvok, rat atum nanglang-ropji.

⁹Arlengkethe cheparjera apok ingkovang apar jung-jung amonit cheplangsi kereng aphan chongdat thurong memu.

¹⁰Kemesen amonit pi atum aphan lana, bonta kehingno abang halatum aphan inghonhe.

¹¹Kechepaduk-khrup abang kechoji ason dorphlup, bonta amokevangve akam along apor kephangno ke kelulo.

¹²Kehingno abang keklemji aning-kehang anta kehingno akam, bonta dhoromi abang arjapthip .

¹³Kehingno amonit alam methang pen chenep-lo, bonta angthikdut abang kesung pen chepajok-lo.

¹⁴Nang kopima keningje lapen keklem aputhaksi nang nong-e longji; nang kelong nangji ason nang longpo.

¹⁵Kelu atum kaiketa amethang chokpet pusi latum chematha. Kereset abang kepare alam arju.

¹⁶Kelu abang aning thilote, la chepaklangdak. Kemathathekser abang kangchek ano chedende.

¹⁷Nang ahok ningje lote, ahok-kangsai klempo, bonta kechobei ahok-he-kangsai anatsi japo.

¹⁸Nokjir asonthotsi keningjepeng alam amek padosi parnukpo, bonta ningjethekser alam pen la pame-un.

¹⁹Kechobei abang achethe thihekji, bonta ahok kaike doverji.

²⁰Kehingno kemang abang aning arlo kechobei do, bonta akeme akam keklem atum aning arong.

²¹Dhoromi atum aphan thangnat kehingno vangve, bonta ajat kelangno atum sungji.

²²Kechobei atum aphan HEMPHU hijimlo, bonta alam kechebi atum aphan aningdok-lo.

²³Kemathathekser atum latum kethek ason an do seta dojoi, bonta kelu atum halatum akechinine pachethang-lo.

²⁴Kedukkhrup akam nangphan jakong piji; keselet ke nangphan ban nangpinchong detpo.

²⁵Keningri ke nangning arong pon-detpo, bonta kanghon alam nangphan pachehokpo.

²⁶Dhoromi amonit ajirpo aphan jaji; bonta kehingno atum atovar halatum aphan ja pamanghuji.

²⁷Nang jongsi seletduk pulote, nang kopisi kerima kaita longlelo, bonta nang kam keklem chepaduk lote, nang kopai meji.

²⁸Dhoromipet akam ke chethe anat atovarlo; kehingno akam ke kethi atovarlo.