Read Karbi SARLAMTHE 14 Bible Online

SARLAMTHE 14 - Karbi bible

SARLAMTHE 14

¹Bidi amethang ahem chekim; bonta kelu akam pen ajok pavirlo.

²Angthikdut ra nang HEMPHU aphan man pilo pu paklangnon; angthikdutde lote nang man pipe pu paklang-lo.

³Kelu anekethesi laphan pasoibok-lo; Kereset abang alam laphan railo.

⁴Chainong avepin ahai kebai nangpuru ingthaidangji, bonta lahei dolote sok dopikji .

⁵Kechikiklong ahaki kaita ahok alam than, bonta kechikino abang thangta thanthe, bonta kechobai.

⁶Kepinrem abang kaita re un-e, bonta kerepik abang kecharli prapjin.

⁷Kelu amonit atum pen chepahe-lonon; Latum nangphan thangta nangthan thekthe.

⁸Kopisi keresak abang reset lo? Pima la kopisi klem nangjima chini. Kopisi kebuiklui abang luvok lo? Pima alangsi chinichot-lo pu mathaver.

⁹Kelu atum latum pap klemseta mathathe, bonta keme amonit atum diya kelongji aninghang.

¹⁰Nangning arong ke nangmethang. Badutame nanglong nangchethak dunde.

¹¹Kehingno abang ahem rurai seta keme amonit ahem arjapverji.

¹²Nang tovar kemelo pu kematha atovar kethi anat nangja pondet tahai.

¹³Kangnek apak-apak ahut ningduk chepatu tahai. Ning-arong dam et aphi ningke-oi kaita dolo.

¹⁴Kehingno amonit atum halatum aning arlo amethang atovar pensi plengset, Kemesen amonit halatum akam-heihei apot nong-e longji.

¹⁵Kelu abang asontin ta kroipetji. Mathathekser atum halahei akengkam langpameji.

¹⁶Kereset atum kesung ahut cheresi do thek, bonta kebuiklui atum chererepin pen klemsusuji.

¹⁷Aning sedengkak atum kelu akam klemporji; Kere muchot abang dojoiji .

¹⁸Kechinine atum halatum aning kehang kelu akam long-lo, bonta kere abang gian chepahemphu-long.

¹⁹Kehingno atum dhoromi aphan man pinangji lapen halatum akerap chohang nangvekji.

²⁰Keduk abangphan baduta aning kedok abang ave, adung abang jokta aningdokde, bonta keplang abang ajirpo do-o.

²¹Nang jongsi nangning chepareng-meji pulote, keduk atum aphan inghonnon; adung aphan kelangrem ke la pap-lo.

²²Nang jongsi akeme akam klemlote nangphan bang nangchikipo lapen man nangpipo; nang jongsi kehingno akam klemlote nang chokchelo.

²³Kam klemnon lapen nang reng-i po; nang jongsi tot-lunra lam ningje chot lote dukvokpo.

²⁴Kereset abang akhi doji, bonta kelu atum akelu akam pen chini un.

²⁵Inut abangpo ahok ahaki ningje lote apran pajok, la chobei lote rat aphan pavirlo.

²⁶HEMPHU aphan man kepi abang inut amonit aningkechethe do, lapen asomar an aphan isi kejokvan do.

²⁷HEMPHU aphan man kepi helo chethe atirilo, aninghang abang kethi aphan chepahelo me.

²⁸Inut arecho anong kethe ke la bangko-an ke-ongdung arat aputhak pangriloma la aputhaksi aning chetheji, halatum avete la thangta kali.

²⁹Nang jongsi dojoi lote, nang kerelo, bonta nang jongsi sedengkak lote, nang ko-an akeluma chepaklang-lo.

³⁰Ningkangsam e-ok aphan pa-rengme, bonta kelang un-e ke kensar akeso ason.

³¹Nang jongsi keduk atum aphan chenek lote, latum aphan kethip a-Arnam aphan nang patherak lo; bonta keduk kelak aphan kangjinso ke alangli laphan man kepilo.

³²Kehingno atum halatum kehingno akam pen ajok amethang aphan kevir chevanlo, bonta kemesen amonit atum ke halatum angthikdut a-otsi raidet-lo.

³³Kereset abang akemathathek along bidi do; bonta kelu abang bidi alam thangta chinine.

³⁴Dhoromi akam isi adet pathelo, pap ke det aphan patherak lo.

³⁵Kechere thek abang aphan recho aningdok, bonta halahei kave det abangphan la aduk pilo.