Read Karbi SARLAMTHE 18 Bible Online

SARLAMTHE 18 - Karbi bible

SARLAMTHE 18

¹Bang kaprek pen chelangdun thekthe amonit atum amethang alam-akamsi chematha chot; abangphutin atum chok pu kechini alam along latum chedondun thekthe.

²Inut kelu abang akechini doma ave la mathathe; la aning kehangnei akam ke kopusonsi reset pu chepaklang helo.

³Pap lapen ketherak damrappo. Nangman avedet, lapen la alar nang ington cholong po.

⁴Monit alam bidi atiri plangthek, la talopi akarnuk ason, kelivoi alangjeng alang ason mirak.

⁵Ado kedo abang aphan keraidun lapen adai kave abangphan ahok-akangsai kelongji pen kekhangdun akeme kali.

⁶Ajehak kelu atum lamthama chedan pangcheng lote la arengsi chongdat lo.

⁷Kelu abang ningje lote, la ame-thang aphan chepavirlo; la alam pen chingnang lo.

⁸Kepalamso ke dokjok-la ili ko-an kejoilutji ninghang-o!

⁹Inut keselet abang akaprek kepavir abang ason hingno lo.

¹⁰HEMPHU ke isi kangtangklong ahemchardon ason hadak dhoromi atum dampen jok longpo.

¹¹Keplang atum, rongsopi kekom-chen apaisong asonsi akhi latum aphan raipo pu chematha.

¹²Badu aphanta chepabihek-he tik ke aman pipe; cheparoka atum ke kevir atovarsi damlo.

¹³Nang kethakji aphrang arju pame nangji. Kali pulote nang chepalu lo lapen chepapinremlo.

¹⁴Kerengji nangning kehangsi nang keso ahut nang parengpo, bonta la nang pangbo lote, nang kejutsi ning kechethe ta damjuipo.

¹⁵Aning kereset atum ke kaita kehung lapen kecharliji akechesik do.

¹⁶Arleng kethedung aphan nang kechetongji ninghangma? Laphan dan ponpinon lapen la joikepo.

¹⁷Kesor kepho abang hili dunde tik ke kangsaihem along kecharvo alam kethan-cheng abang kaita ahok nangnakji.

¹⁸Kangsaihem along kecharvo alam kepho atum alam chedaikoi pulote, khadot-heihei kepathu pen alam pangsam un.

¹⁹Nang korte aphan cherap non, lapen kangtangrak arongsopi apaisong ason thakthak nangraipo, bonta la pen nang chebohong lote, la anghap nangphan chinghapthippo.

²⁰Monit angho pen keningje alamthe pen rengpo, lapen la angtur pen kebar alamthe pen aning jangpo.

²¹Kepathi lapen kepareng ajakong de along dolo, lapen la aningkedok abang la athe cholongji.

²²Piso kecholong abang isi kemesen amar si long-lo. HEMPHU pen la kangjinso long.

²³Keboi abang choningriji bonta keplang abang lam-kangtang pen thakji.

²⁴Kechekrongchot ajirpo atum ajehak do, bonta akorte ason ansose kechephonei ajirpo ta do.