Read Karbi SARLAMTHE 19 Bible Online

SARLAMTHE 19 - Karbi bible

SARLAMTHE 19

¹Inut kechobeichot lapen kelu abang apar inut athikpet pen kedo abang memu;

²Gian kavepin pen aning kehangchot ke inut amonit aphan keme-o kali, lapen ketong var-ret abang amethang atovar chepangboji.

³Inut amonit akelu pen amethang atovar chepavirsi la aning HEMPHU aphan thipo.

⁴Khi-dat ongdung ajirpo kemi vanji, bonta inut kedukvok abangphan ajirpo atum otekangbubji.

⁵Isi ahok-he ahaki aduk pilonglepin pen damjoije lapen kechobei alam keningje abang seta jokphlotphle.

⁶Ongdung atum aning kechejoi abang pen kangjinso riji, lapen dan-heihei kepi abangphu ajirpo abangphutinta cheplangji ninghang.

⁷Inut keduk abangphan akortemar kedo anta hijimlo, la ajirpo atum la pen ko-an chepahelo loma! Alam pen latum aphan la hungdun lo, bonta latum aphan longle.

⁸Bidi kelong abang amethang aphan chinghonlo, Kechini kechebi abang plangji.

⁹Isi ahok-he ahaki aduk phophepin pu damlongjoije, lapen kechobei atum alam keningje abang virdetji.

¹⁰Inut kelu abang akerengme pen do nangne, lapen ban abang rechoso atum aphuthak pangri nangne.

¹¹Kemathathek inut amonit aphan aning pathidapde, lapen kechokche aputhak kelangding un ke la anong lo.

¹²Recho aningkethi lake hingho kang-rong ason, bonta la akangjinso ke bap ajo ar-e keklo ason.

¹³Inut kelu asopo ke apo aphan akevirlo, lapen kechebohong apiso ke keklo dop-dop a-arve ason.

¹⁴Hem lapen khi apo atum pensi kebochelong, bonta inut abidi kedo apiso ke HEMPHU penlo.

¹⁵Keselet monit amek pajangthip, lapen do pangtar abang an ingchirji.

¹⁶Hukum kekroi abang achethe chepangjok; lam karjuje abang thiji.

¹⁷Keduk aphan kangjinso abang HEMPHU aphan paramlo, lapen la keklem apot laphan alangli pithuji.

¹⁸Ning kechethe un ahut osomar aphan pakengnon; la kepavirdetji aphan nangning ton-e-rinon.

¹⁹Aning kesedengkak abang adai tu nangpo; pima laphan nang ephong pajok-lote, nang laphan pajokthu nangbompo.

²⁰Kepare alam arjunon lapen kepinkhat alam dengnon, anke mo aphi aphan nangli bidi long-o tahai.

²¹Monit aning akemang ongdung, bonta HEMPHU aningkehang pensi la pathir unchotji.

²²Monit aphan aningkedok ke kechingkime helo, lapen kechobeichot abang mute inut kedukvok abang memu.

²³HEMPHU aphan kephere ke chethe anatsi cheja lo; lapen la kelong abang aningjangrem pen sanglongji.

²⁴Keselet abang ari kasu arlo chephuver lapen la angho kecheponji anta keselet.

²⁵Kepinrem abangphan arengpaso non, lapen eleppet atum charlithekpo; Kechini abangphan parenon lapen alangli gian longpo.

²⁶Apo aphan kethurkhrap abang lapen apei aphan kephlung abang ke anong kejuno lapen mahang api kepathi abang-lo.

²⁷Sopo, kepinkhat asai karjuji ke gian alam-heihei pen kesui lo.

²⁸Amokevangve ahaki ahok-akang-sai aphan pinrem, lapen kehingno abang angho pap joi-det po.

²⁹Kepinrem atum aphan kekhinde, lapen kelu atum aphan anung kesapjisi inghongphrong lo.