Read Karbi SARLAMTHE 20 Bible Online

SARLAMTHE 20 - Karbi bible

SARLAMTHE 20

¹Drakha-ahor ke nangliphan pasoibok po, kangritham ke pachebohong po, lapen lahei pen kepajalong ke kereset abang kali.

²Recho aningkethi ke kangrong ahingho asonlo, la aphan aning kepathi abang methang apransi charmut lo.

³Badu akelu abang seta charvothek, bonta lahei pen chepahelo abang anongjume.

⁴Ketiki abang apor ahut ahidi hai kebai selet abang ke thangnatta cherot longledetji.

⁵Inut amonit akematha-heihei karnuk alangtuk arlo kedo alang ason, bonta mathathekser abang lahei sok thek.

⁶Abangphutin ta kroipet lapen kekroi thirklong-lo chepu, bonta ahok akekroi kedo abang komatsi longthek?

⁷Athikpet lapen kechokpet akam keklem abang aphan kepapo-long a-osomar atum akopai keme.

⁸Kangsai anghoi kangni arecho langpamelote la kehingno thek-longpo.

⁹Komatsi pu unpo, “nening chepang-thiret-lo; nepap pen ne ingthirpame lo?”

¹⁰Ahok-he alin lapen athuli-heihei kerim atum aphan HEMPHU hijimlo.

¹¹Inut a-oso jokta la kangthir lapen kechokpet akam klemloma la akam pen paklang-lo.

¹²Kelangji aphan emek lapen karjuji aphan eno-heihei HEMPHU ephan epitang-lo.

¹³Nang jongsi nangmek kejang-lok apor chepadam lote nang dukvokji. Kam klemvoinon lapen nang kechoji aphan dorphlupji.

¹⁴Ador so-ong pusi kenam atum khinde, bonta la damjui aphi la ane chepathepo.

¹⁵Nang jongsi nang keningje alam chechini lote, ser mate dorson-heihei apar ador keso amar nang dolo.

¹⁶Kechininepin abang apreng ketuji kechakdun abang ke kelupik abang-lo lapen lason atum kechetuji aphan amar khang nangji.

¹⁷Ahok-he pen kelong akhi pen kemenei a-an nang cholong tahai, bonta aphi prapjin pen la sangti a-om cheplangji.

¹⁸Akeme akepare rinon, lapen nang-kam chunji, akemang avepin pen ron chedanri.

¹⁹Ade karjang abang kepatu alam paklang, lasi lason ade ketan amonit pen chelangri.

²⁰Nang jongsi nangpei-nangpo aphan ington lote kangting ajo kemep amelur asonsi nangchethe jutkokji.

²¹Ko-an akejoi pen nang khi longma la ansi nangphan akam vangvedetpo.

²²Kechokche alar nang methang huiri. HEMPHU aphan chikinon la Alangli pamepo.

²³Ahok-he athuli lapen alin-heihei kerim atum aphan HEMPHU hijimlo.

²⁴Etovar HEMPHU-si pathik-lo; tangte amethang akai atovar kosonsi inut abang chechinine pu thekpo?

²⁵Arnam aphan dan kepiji pu kechak aphrang nangmathapame nangji. Aphi nangning che-oilak tahai.

²⁶Kereset arecho abang komatsi kehingno keklem ma ripo lapen halaphan ingjinsose pin pen aduk pipo.

²⁷Monit akarjong ke HEMPHU amelur ason, la aning arlo kedo-an ardungrok.

²⁸Inut arecho athikpet, ahokpet, lapen mesen pen pangritik an la recho cholongbomji.

²⁹Okengjang atum anong halatum ajakong helo, bonta arleng kesar ake-langme ke halatum achu kelok helo.

³⁰Ahut pen ahut etovar-heihei kechelarji aphan akesung ason chechak nangkok.