Read Karbi SARLAMTHE 22 Bible Online

SARLAMTHE 22 - Karbi bible

SARLAMTHE 22

¹Nang jongsi nongjume lapen keplang-o angbong ingvai lote nongjume le ingvai non.

²Keplang lapen keduk atum ta do: HEMPHU-si halatum aphan pinchong-lo.

³Kereset abang kesung kevang thek longji lapen la chepaheloji, bonta kemathathe abang la ajo kengkam chejorji lapen aphi aning che-oiji.

⁴HEMPHU aphan kroinon; chepabi-heknon, lapen nang keplang-kephi, man, lapen chethe-keding longpo.

⁵Nang jongsi nangchethe chinghonduk pulote, kehingno atum kenepjoi atovar along apham-heihei pen chepahelonon.

⁶Oso kedam nangji atovar than pamenon, lapen la sarru anta la pen suise detpo.

⁷Keduk atum ke keplang atum abanlo. Tangka choram lote nangke keparam abang abanlo.

⁸Nang jongsi ahok-he achili rik-lote, akevir nangklangpo, lapen nang bang aphan kechenek jutpo.

⁹Chingchomri lapen keduk atum pen nang ahirjume longji.

¹⁰Kepinrem abang aphan arphlung-non, anke lam kechedan, kechebohong mate amen-akur kehangdong avedetpo.

¹¹Nang jongsi ning kangthirjir lapen kangjinso plengset alam keningje ninghang lote, recho nang pen jirpo plangpo.

¹²Kechobei alam kekroidunde pen ajok ahok alam kerai aphan HEMPHU lang.

¹³Keselet abang hem dover, la ingtan barlote, hingho chodet tahai pusi puji.

¹⁴Angho kejuno a-arloso angho ke isi karnuk ahilik ason; HEMPHU aningkethi abangphu hadak klodampo.

¹⁵Oso aning lubup, mathathepin pen klem, bonta kepakeng akaibongsi laphan pakengpo.

¹⁶Keplang-o atum aphan dan-heihei kepijile mate keplangji aphan keduk aphuthak chenek lote, nang methangsi dukvokpo.

¹⁷Arjutha lapen kereset monit atum keputang alam ne nangthanpo. Halatum kethan-heihei munthi pamenon,

¹⁸lapen lahei nang jongsi nang chemathadam lote, lapen lahei jongdam thek-lote nangning arongvoiji.

¹⁹Nang HEMPHU aphan chiki non, lasi ne lahei non nangphan nangthanpo.

²⁰The thomkep ne nangphan nangtok pilo, lahei gian lapen mesen kepare alam dolo,

²¹lapen ahok kopima nangphan than pachinipo.

²²Nang avarsai kelong ahut pura keduk atum aphan berhet-ri; Kangsai ahem keboidet abang aphuthak thang ale-avarsai endunri.

²³HEMPHU-si halatum alam chedan dunpo, lapen halatum aphan kepaphere abangphan apran papherepo.

²⁴Kesedengkak; kephangnotap, atum pen pajirpo-ri.

²⁵Nang halatum a-ot chinilo tahai lapen latum chepaprekpre.

²⁶Bang apreng arpu ke-enji chechak dunri.

²⁷Nang jongsi tu-pi un-e lote, latum nang hongplang anta pondetpo.

²⁸Nangphusar atum kepathirtang ahoi terek-ri.

²⁹Kemesen akam keklem abang nephan paklang non, lapen nangphan ne inut kemenei abang lapen recho ajirpo atheng amonit nang paklangpo.