Read Karbi SARLAMTHE 23 Bible Online

SARLAMTHE 23 - Karbi bible

SARLAMTHE 23

¹Arlengkethe pen nang an kechoji ingni rappet ahut, alangli komatma nangning chebi vertu.

²Nang jongsi cho-oji ninghang pulote chekhangnon.

³Alangli nangkepi akeme ason aputhak chobohori; alangli nangphan asat kelangji bor-i-lo tahai.

⁴Keplangji aphan kam keklem tong-nornera chepareset non.

⁵Arveng kedo api ason lapen vomu kangjarjui ason nang tangka menmen dam et un.

⁶Kechingchom amonit a-an chori mate la nangkepi kemesen a-an aputhak bohori.

⁷“Vangnon lapen asap-o nangchotha,” pu la puji, bonta laphanle la kepu kali. La kopi kopisi kemathama halasi ahok lo.

⁸Nang kecho ason ching-ok ji, lapen nang lam keme keningje pajumenakpo.

⁹Kelu abangphan lamjume ningjeri; la, la choro thekthe, la nanglamjume pinrem-thurongpo.

¹⁰Ahoiban terek-ri mate jangreng atum alongle cheraipiri.

¹¹HEMPHU helo halatum aphan kangtangnei keraipi abang, lapen alangli nangli bethursi halatum kepholok alam chedanpipo.

¹²Nangphan kethan abang aphan nangno cheden tu lapen un an charlinon.

¹³Oso aphan pakeng haiheri. Nangkaibong pen chok seta la thithe.

¹⁴Ahok alam pudam lote laphan nang chom pen pajok po.

¹⁵Sopo, nang jongsi reset-lote, nening arongpikji.

¹⁶Nang ingho pen bidisore alam keningje ne arju long lote nening arong-o po.

¹⁷Papi atum aphan nang langselet-ri; HEMPHU aphan man kepijile nangkai matha-e non.

¹⁸La jongsi nang klem lote, kevangji nangkai ke klarbong doji.

¹⁹Arjutha, sopo, chepareset non lapen nangkai atovar aputhak matha parsik pamenon.

²⁰Hor kejunpik amonit atum mate ok kecho-boho amonit atum pen chelangri.

²¹Hor kangri atum lapen keboho atum aphan padukdetji. Nang jongsi chochot lapen nangmek-jangchot pulote nang sakprotpo.

²²Nangpo alam arjutha; alang pen pete nang mahang thek un-e. Nangpei sarpi lote nang pinremri.

²³Ahok bidi, kecharli lapen kema-thathek-lahei nam non lapen jorri.

²⁴Inut dhoromi amonit apo aning cheparongji athe do. Kereset nangso aphuthak nang chehok long.

²⁵Nangpo-nangpei nangphuthak pachehok-longnon; nangpei aphan la pachehok longnon.

²⁶Nangno cheden pamenon, sopo, lapen nekai nangphan arjan paplang-nang.

²⁷Beisa lapen akhat kave a-arloso atum ke isi aphamlo,

²⁸dokait atum ason latum nangphan chonghong-ding-lo, lapen ongdung amonit atum aphan a-ot phangholo.

²⁹Matsi sung-lo? Matsi duk-lo? Matsi charvolo? Matsi chimin? Athe avepin pen matsi areng-amek do? Matsi amek erring-rang lo?

³⁰Hor aphan kehonklung abang, hor kepangvuiji kebor-i dam atum.

³¹Hor nangphan asat nangpalang longri, la erdop seta, la harlung arlujai seta, lapen la jundet meme seta.

³²Puthot arni abikedo apherui nangkarchu ason nang chethekpo.

³³Nangmek pinisi pathek longpo, lapen nangning alam paningje-thappo.

³⁴Talo angbong chitim nang ketilai, telong archok athak ketilai ason nang chethekpo.

³⁵“Nephan ne arbutang-lo” pusi nang chepupo; “Nephan ne choktang-lo, bonta ne ke chechininedet-lo. Ne kopi apotsi bur un-e detma? Ne abong kaprek junthu nangjilang.”