Read Karbi SARLAMTHE 24 Bible Online

SARLAMTHE 24 - Karbi bible

SARLAMTHE 24

¹Kehingno amonit atum aphan lang-un-e nangne, lapen halatum pen pajirpo nangne.

²Kepa-sungjisi halatum mathaver; latum angho kechingpu abataitin inut ma inut aphan aning pasolo.

³Bidi pensi hem kim, lapen kechini thek pensi la pathir;

⁴gian pensi angdeng-heihei an ador keso amar pen papleng.

⁵Jakong kethe abang mute kereset abang ingtangmu , lapen ajakong kedo abang mute agian kedo abang ingtangmu.

⁶Pima kere akeja pensi nang ron chedan unji, lapen ongdung athanpare pensi nang hai unji.

⁷Kelu abangphan bidi alam ke ingtui-ongchot. Thedung alam-heihei kechingvai ahut la thangta angho chingpu dun thekthe.

⁸Nang jongsi kaike kehingno mang lote, nang kepasung abang pusi nangnong chethangrongpo.

⁹Kelu abang kemang ason an ta papsi plengset. Kepinrem abangphan monit atum hijim.

¹⁰Kesung ahut nang ainilak lote nang jakong kave abang binong lo.

¹¹Kepathiji pu kepon atum aphan kepajokdunji mori.

¹²Lake nekam kali pu nang ningje tahai, bonta Arnam nangning kematha alam chini lapen ingsailo. Alangli nangphuthak lang lo. Lapen nang keklem ateng pen nangphan nong-e nangpipo.

¹³Sopo, pijo-alang junnon; la mesen. Lapen ahom along apijo alang nangdokmuchotlang.

¹⁴Nang chini pamepo bidi karjong aphan mesen. Bidi rinon lapen nangphi akai klarborji.

¹⁵Kehingno atum dhoromi amonit aphan thi parohum mate ahem keponjisi kemang ason cheplangri.

¹⁶Dhoromi abang batai throksi krep seta thurthuji; bonta akesungsi kehingno abangphan pavir.

¹⁷Nanghotur kesung kepho ahut chehok-ri, lapen hala chingkoi seta ningcheparong dunri.

¹⁸HEMPHU la chinira aning nangdokde det ra halaphan aduk pipe det apot-lo.

¹⁹Kehingno atum nangphuthak nangpaningri long-ri; halatum aphan lang un-e-ri.

²⁰Inut kehingno abang thangnat aning kechethe ason ave-aphrang kelangji ason ave.

²¹HEMPHU aphan man pinon, sopo, lapen recho aphan aman pitu pu pu aphan kroimori;

²²Arnam mate rechosi kepasung-lo pu mathari.

²³Arlengkere atum lahei alam ta ningjelo: Kangsai abang abe kedun hingno.

²⁴Adai kave abangphan ado dolo pu ningje lote, laphan ahirjuno hangpo lapen abangphutinta hijimpetpo.

²⁵Adai kedo abangphan aduk kepi akangsai atum, tebonseta chingthurji lapen anong jume charju longji.

²⁶Ahokpet pen kethak helo ahok ajirpo angthek-lo.

²⁷Nanghidi-heihei chesik longletik nanghem chepathir-ritha, anke nang kerengji aphan chopangrum unpo.

²⁸Kemesen athe longletik ke nang bang aphan aporman piri, mate halabangso aphan ahok-he alam ningje-ri.

²⁹“Alang nephan nekeklem asonthot neta laphan klemji! Nephan keklem alar ne huiji! Lason puri.”

³⁰Ne inut keselet lapen kelu amonit adrakha ahidi anat damlo.

³¹Hadak bap ingsu-heihei si plengset lapen nonpelar-heihei jirthip. Hala kekomchen a-arlong apai ingrai-et lo.

³²La ne lang-lo, la aputhak matha lo, lapen la pen eson alam charli long-lo:

³³Nangning hangte nangmek jangtame. Nangri chehingpring-ra malomso sangtame,

³⁴bonta nangmek kejang ahut, risim kedo akanghupi ason keduk nangphan nang-teng khengpo.