Read Karbi SARLAMTHE 25 Bible Online

SARLAMTHE 25 - Karbi bible

SARLAMTHE 25

¹Solomon asarlamthe lahei Judah a-Recho Hezekiah kangsai ahem along kedodun amonitsi tok dunlo.

²Kebi karsik akam ke Arnam anong-lo; bonta recho atum anong ke lahei kephur helo.

³Recho kopisi kemathaloma nang chinine; lake sining kangtui, mate talopi karnuk ason, eli chini un-e.

⁴Rup pen aju an ennon anke kechor abang klempamesen thekpo.

⁵Kehingno atum recho pen pahelonon anke ahok akangsai pen pangrilongpo.

⁶Recho angno nang karjap ahut, alangli ingno chepaklangvaret lapen arlengkethelo pu palemlem nangne.

⁷Rechoso atum angno inghoi kangdai reng-rot pu ekepulong mute “Vangnon inghoikangtui nang ingni non” pu epahanglongsi akeme.

⁸Pine thek-lok pen kangsai ahem dam paprap nangne. Aphi anut kaprek ahaki pen ajok nang chokche pu angthek vanlote nang kopisi keklempo.

⁹Jongsi nang lapen nangdung atum pen lam chehilisei dolote nangtum angbong lam chepajutdetnon lapen bang aphan thanno alam thanri non.

¹⁰Kalite nangthan nangne alam bithekthe pu kadokave ta chini petpo, lapen nang nongno doverpo.

¹¹Kevardop alamthe lake rup ang-bong kepangni alon kepi aser asonlo.

¹²Kethek abang kepacheretoi alam karju ke kemenei aser pen kepachor ajangsai mate adorson apar adorsomu lo.

¹³Kechikiklong apherangke ketoi abang aphan kerot apor arni keso ahut lang kangsam le kepangsam ason aningpangsam.

¹⁴Kechak ason kepipe amonit atum ke arve kevanve anghun lapen atomon ason.

¹⁵Ning chepaningding pen kekok-e ason kangtangnei akekhang seta phri un lapen pangri atum aphanta pakroi un.

¹⁶Nang akenang apar ake-ong apijo-alang junri; junlote ching-okji.

¹⁷Nangdun ahem vurdamverri; la nanglang selet duksi nang hijim det apot-lo.

¹⁸Keboktap ke kepathi un anok, achir mate kereset athai aso ason.

¹⁹Kesung ahut kechikino abangphan kechiki lake kehaiduk aso pen an kehije bor-i ason mate ketekok akeng pen kedam bor-i ason lo.

²⁰Aningke-oi amonit aphan lun kelunpi lake kangsam ahut achoi kephlok mate keso amek along ingti kehi asonlo.

²¹Nanghotur jongsi ingchir lote, an pinon, lang ing-it lote, lang pinon.

²²La chetherak po, lapen HEMPHU nangphan nong-e nangpipo.

²³Nirep atomon arve kevanvek asonsi kechepalamso alam ningpathivek-lo.

²⁴Chebohong turlur a-arloso pen kedorap-rap mute hem sarnung angsong kedo memu.

²⁵Kejutsi, kehelo adet pen birta keme karjulong lake kekreng lapen kangit ahut lang kangsam kejunlong asonlo.

²⁶Kehingno abangphan inut keme-sen abang dim kepek alam, nangphan kecheho alangjeng mate bikar kedo alangtuk alamsi pachinilo.

²⁷Ongdung apijo alang nangphan me-o-e, mate man akangtuinei kelongji pu kerivarret aman asonlo.

²⁸Nang ningkethi jongsi nang chekhang un-e lote nang ke arpong kave arongsopi ketengkheng kejoi ke asonpo.