Read Karbi SARLAMTHE 26 Bible Online

SARLAMTHE 26 - Karbi bible

SARLAMTHE 26

¹Kelu abangphan kero ke ale chelongle lake barla ahut aherai mate kerot-kerim ahut a-arve asonlo.

²Nang jongsi atheng kalite kangton nangphan lahei nangpasung un-e, lahei ke kedopathirthe avo atum kangjar ason.

³Losei aphan sap nangji, gadha aphan anokan arrivung nangji, lapen kelu abangphan areng paso nangji.

⁴Kelu amovangve alam karju thak-ri, kalite nangta hala karju abang asonthot po.

⁵Kelu abang kechechini thekji aphanle kelu aphan thakdunnon.

⁶Kelu abangphan jongsi birta pathantoilote nangmethang akeng kechechor asonlo; nang kesung chovanrong-lo.

⁷Tekok abang akeng janglak, ningjoino asonthotsi kelu atum angho asarlamtheta lasonlo.

⁸Kelu abangphan keso mute robor-abathuli along arlong kerak-het chekengthumu.

⁹Kelu abang kereset alam kejong dam lake horkangri amonit ari ingsu kechehek asonlo.

¹⁰Kevang along kelu abangphan kam kepi abang bangphutin aphan aning pa-oi chot-lo.

¹¹Kelu abang kechokche lethot akam keklemthu lake methanle keching-oktang kechechothu asonlo.

¹²Amethang re-o pu kechetin abang mute kelunei abang ningkechethe dothumu.

¹³Keselet abang tovar hingho do pusi koibompo, lapen hempen barbelo.

¹⁴Keselet abang hongplang along abang chepharlepvoi. Inghap akobja an pen apar la lele.

¹⁵Ajehak atum ke angho an kechepon anta keselet.

¹⁶Inut keselet abang bangthroksi athe kethanthek an sose remu pusi kechetin.

¹⁷Lam kechedan along kelut dun nang kam kali, lake tovarpi methan nepsi ano ketumling asonlo.

¹⁸Inut amonit mane aphan ja-phalangno amat ne paremremchot pu kepu ke,

¹⁹inut angcham amonit kereset arisim pen kepathu asonlo.

²⁰Theng ik lote me mepdet lapen kechepalamso avete kechebohong ta ave.

²¹Me akri aphan hokvai lapen me-akar aphan theng asonsi kechebohong turlur atum lam chedan verlo.

²²Chepalamso atum alam dokpik chomepik a-an ason thakthak; lahei abang arlo anta ledamlo.

²³Aning kehingno atum angtur lake longle atibuk kedip-i kechecharplot asisa adip ason.

²⁴Kehijim abang kechepanang angtur pen duidet lapen aning arlo kepachorei chebilo;

²⁵Lason atum kangjinso alam-heihei ningje seta, kroidunri, pima la aning arlo sonthroksi kehijimpik dolo;

²⁶la akehijim patulang-lang seta mei along le akehingno klangdakji.

²⁷Hilik ketuk abangthotsi la arlo jangji, lapen arlong kepakong-long abang anat thotsi la chevangthuji.

²⁸Kepachorei ade kepho abangphan hijim lapen kechongthui angho pavir.