Read Karbi SARLAMTHE 27 Bible Online

SARLAMTHE 27 - Karbi bible

SARLAMTHE 27

¹Penap aphan chepindakri, pima non pen kopi plangjima nang chechinine.

²Bangle nangphan nangparonang, bonta nang methang angho pen kali; bang kaprek, bonta nang ingtur pen kali.

³Arlong ardik-o, lapen sangti alin vang-o, bonta kelu abang ening kepa-oi la sonni apar ardikmu.

⁴Ningkepung pherememe, ningkethi chepahaithor, bonta kelang un-e angno komatsi arjap un poma?

⁵Kepatujoi akanghon mute angno ketam memu.

⁶Akeme aphansi jirpo abang eri pasodak; seta hotur akangjup ke pacherei chot.

⁷Kangkrangling ahut pijo alang akam ave, bonta kangchir ahut kehodak asonta dokjin nangnakji.

⁸Ahem keche-osi kedamtap abang atar keche-o kangjarthap avo ason.

⁹Jangthu lapen jangthu-nempru ening parong, bonta kesung nangphan ningkangsam pave.

¹⁰Nang jirpo lapen nangpo ajirpo atum aphan o-ri; lapen nang kesung ahut nangkorte ahem damri. Kehelo kedo akorte aphan mute nangdung abang memu.

¹¹Chepareset tu, sopo, lapen ne-ning parongtu, anke nephan nekepinrem abang aphan ne thakdun mesenpo.

¹²Kereset abang kesung chechar lapen amethang chepatuthek; bonta kelu abang dambom lapen la ajok sung-i.

¹³Inut amonit kechinine abangphan kepiji chaktang lote ape en dundetnon, lapen bang adet amonit atum aphan la kepiji chak lote la pen amar khangdunnon.

¹⁴Adung abangphan adapprang asekethe pen ahirjume hang-lote, ahirjuno pusi lakha detpo.

¹⁵Kechebohong keturlur apiso ke arve kejang ahut keklo dopdop ason;

¹⁶bangpi aphan kekhang ke tomon aphansi kekhang-lo mate ari ar-e pen jangthu ketumhet ason.

¹⁷Ingchin aphan karso ingchin pen, lapen monit hijansi cheparethek.

¹⁸Thebo arong ke-ora abang athe cholongji, lapen ahemphu aphan ke-ora abang anongjume.

¹⁹Lang along mahang kechethek-long asonthotsi monit aning alam monit aphan pachini.

²⁰Chom lapen Abaddon kaita aning ingsamse, lasonsi monit amek ta dorlo pupe.

²¹Aju kepangthir amar ke rup aphan lapen me ke ser aphan lo, lasonsi inut amonit akeso pen ajok a-ot klangdak.

²²Inut akelu aphan himkekoi-i a-arlong lapen lengpum pen tok-rop seta la akelubui la pen chekak-ke.

²³Nang kevi api-heihei me-hingno loma chechini pame masi, lapen nangpi-ahur aphan chelang pamenon,

²⁴pima keplang-kephi doverve, lapen rechokebat a-ove-a-ove aphan dojima?

²⁵Bap rotdet seta akemi nangchingjok, lapen inglong-heihei abapso ta pangrumlongji,

²⁶biresak-heihei si nangpe-ri padorpo, lapen bi-heihei hidi anam nangvanpipo.

²⁷Nang kechoji aphan hem-isi aphanta lapen nangbanpi atum aphan kepinangji anta dorphlup bi achulang longpo.