Read Karbi SARLAMTHE 28 Bible Online

SARLAMTHE 28 - Karbi bible

SARLAMTHE 28

¹Jok-le hunghe seta kehingno abang kat, bonta dhoromi abang hingho ason angthin the-o.

²Isi adet pap klemlote la kepangri abang ongdung; bonta akechinithek lapen gian pen la ajir kedingklui an pathirpo.

³Keduk amonit abang keduk-atum aphan chenek lote la kecho amar kepavir a-arve kejangsop asonlo.

⁴Aron ke-o abang kehingno abang-phan rolo, bonta aron kerim abang halahei abe thurverlo.

⁵Kehingno amonit ahok-akangsai chinine, bonta HEMPHU aphan keri abang la chinipamelo.

⁶Keplang-o atovar chephangno abang mute akengkam ahokpet pen kechejor abang memu.

⁷Aron kerim abang kereset asopo lo, bonta jongboho asong kejelangdun abang apo aphan patherak lo.

⁸Ale ke-en-o lapen ador kepathe ke-en pen akhi chepaplang abang ke keduk atum aphan kangjinso abangphansi la pangrumpichotpo.

⁹Badutame aron alam karjuji pen ano chepahelo lote, la akardom amat ta hijimmemelo.

¹⁰Dhoromi abangphan kehingno atovar kejapon abang amethang ahilik arlo jangthotji; bonta adokave abang akeme amar chepahemphu longji.

¹¹Keplang-o abang amethang amek angden resetsi chethek-lo, bonta kechinithek keduk abang la aning alam rithek.

¹²Dhoromi abang kehai ahut anongthepikji; bonta kehingno abang the lote monit atum chepatuklip.

¹³Apap-heihei kechepatu abang akai chingthurthe, bonta halahei kechekobir lapen keche-o abang kangjinso longji.

¹⁴Kaike HEMPHU aphan kephere abang rengme, bonta aning chepangtangrak abang kesung phoji.

¹⁵Keduk arat aphuthak kehingno pangribang lake kangrong ahingho mate kekorji athokvam asonlo.

¹⁶Kechinithek kave apangribang lake inut kesedeng-ot akechenek abang-lo, bonta ahok-he pu kelong ason kehijim abang achethe chepeng-lo.

¹⁷Bang kaprek ave apot inut amonit anghor dolote la thithetik pakatnang; baduta laphan parap-re det nang.

¹⁸Athikpet pen kengkam chejorpame abang hilik arlo jangje.

¹⁹Arit saiketiki abang an dorphlupji, bonta alekave ason kehung abang keduk dureredetji.

²⁰Kekroithirklong abang ahirjume longpikji; bonta kechepaplang-dapji rirok abang aduk phophe detpo lapu kali.

²¹Abe abe kedun ke hingno, bonta him echetnat pen ajok inut amonit kehingno klemthek.

²²Kechingchom abang keplangji aphan hungpik, lapen kedorde la aphuthak vangji pu chechinine.

²³Inut amonit aphan pakeng-lote kechongthui angtur apar aphi la aning nangdokji.

²⁴Apo lapen apei aphan chobeisi chepulo, “Lake pap kali,” lason abang kepavirdet atum ajirpolo.

²⁵Kecho-kehung abang pacharvo, bonta HEMPHU aphan kechiki abang plang-opo.

²⁶Amethang aning aphan kechiki ke kelu abang-lo; bonta bidi pen kengkam kechejor abang kejok longji.

²⁷Keduk atum aphan kepajir abang tang-re-redetji, bonta kelangle abang hirjunosi longji.

²⁸Kehingno abang thelote monit atum chepatu, bonta latum vir-lote, dhoromi atum chingthurpo.