Read Karbi SARLAMTHE 29 Bible Online

SARLAMTHE 29 - Karbi bible

SARLAMTHE 29

¹Badutame pakengbom pen aning chepangtangver lote, pame un-e pin pen ingdipetpo.

²Dhoromi atum kethe ahut rat atum chehok; bonta kehingno abang pangri lote, rat-atum aduk dopo.

³Badutame bidi aningkedok abang apo aphan pachehok, bonta beisa atum pen pajirpo atum ke akhi chepadamchot.

⁴Ahok-akangsai pen recho abang det pathir, bonta dan-heihei kar-i chot abang la pavir.

⁵Adung abangphan kechongthui abang amethang aphan pham kechetot asonlo.

⁶Kehingno abang apap pensi chingnang, bonta dhoromi abang lun-lun lapen chehok.

⁷Dhoromi abang keduk atum ajakong-heihei chini; kehingno abang lason agian alam chinithekthe.

⁸Kepinrem atum rongso-pi keilo, bonta reset abang aning pajonlo.

⁹Reset abang jongsi kelu abang pen lam chedan lote, kelu abang aning thichot lapen ingnekchoi, lapen dojoijelo.

¹⁰Adai kavepin abangphan vi kepabu atum hijim, bonta lason amonit aphan dhoromi abang raiji .

¹¹Kelu abang aningkethi chepaklang-dak, bonta reset abang la chekhang.

¹²Kechobei alam kepangribang arjudun rong-lote, la aban atum an ta hingno-et po.

¹³Keduk atum lapen pachenek atum chingrumrappet; pu pu aphanta HEMPHU-si amek akethe-ang pilo.

¹⁴Recho jongsi keduk aphan kangsai pachingbarpet lote, la anghoi kaiketa thirklongji.

¹⁵Keibong pen kepakengsi bidi pi, bonta aso aphan aninghang aling pado lote, apei aphan ketherak vanlo.

¹⁶Kehingno abang pangri lote, pap chanpo; bonta dhoromi atum halatum akevir cholangpo.

¹⁷Nangso aphan pakengnon, lapen la nangphan nangpasang longpo; la aning parongpo.

¹⁸Kemontri avelote rat atum choklemjam, bonta aron kerim abang rengme.

¹⁹Alam pen chot ke ban keng un-e, pima la chini seta la ano cheden-dedetpo.

²⁰Alam chekhangkhe det apor kelu abang ningkethi domu.

²¹Badutame aban aphan aning kehang aling pilote, mo arnisi la nang chepahemphu amar anta cheraidetpo.

²²Aning kesedeng abang pachebo-hong lapen aning chepathiver abang pap klem-o.

²³Monit ane laphan pasunpo, bonta badutame asotdut abang aman longji.

²⁴Kanghu ajirpo akai aphan chehijimlo, la ahirjuno arjulong seta thanthe.

²⁵Monit aphan kephere ke apham kechetot-lo, bonta badutame HEMPHU aphan kechiki abang jok-lo.

²⁶Ongdung atum pangribang akangjinso rihur, bonta HEMPHU pensi inut amonit ahok-akangsai long.

²⁷Inut ahok-he akangsai abang dho-romi abang hijimlo, bonta badutame atovar kekengset abangphan kehingno abang hijim.