Read Karbi SARLAMTHE 3 Bible Online

SARLAMTHE 3 - Karbi bible

SARLAMTHE 3

¹Sopo, ne nangkethan alam an teng-neri. Ne nang paklemtoi akam an kaiketa chemathathunon.

²Ne kethan alam pen nang kai lapen nangchethe ding-o-po lapen chingthurpo.

³Keching-kime lapen kekroithirklong nangpen pache-o-longri. Lahei nang chethok along chekok dong non; nangning athak lahei tok-etnon.

⁴Nang la klemlote, Arnam lapen monit-ta nangphan aning dok-opo.

⁵Nangning do-an pen HEMPHU aphan chiki non. Nang kematha lapen kechini aputhak kaita chikiri.

⁶Nang asontin keklem ahut HEMPHU aphan chemathanon, lapen Alangli nangphan akeme atovar nang paklangpo.

⁷Nang reset pu nangmethang chemathari, HEMPHU aphan kroira kehingno akam klemrinon.

⁸Nang jongsi la klemlote la isi kemesen adovai asonpo, nangreng amek mepo, lapen nangreppi sorup-relo.

⁹Nang longle pen kelong athe-heihei akeme an HEMPHU aphan dan kepi pen Alangliphan man pinon.

¹⁰Nang la klemlote, nangpuru-heihei sok plengthup po lapen drakha-ahorlang nang la do-anta pangrum pikpo.

¹¹Sopo, nangphan HEMPHU nangkepa-keng ahut nangno chedendun pamenon lapen la kepacherelo pura dengnon.

¹²Inut apo aningkechethe asopo aphan kepakeng asonthotsi HEMPHU kechinghon abangphan alangli pakeng-lo.

¹³Kereset keplanglong abang rengme-la kechini long-lo.

¹⁴Ser-Rup along apar la along ale domu; la nangphan ser apar ador somu.

¹⁵Bidi ke dorson-heihei an sose ador keso; nang la jat ason penta pangbar un-e.

¹⁶Bidi nangphan chethe keding, khi lapen man nangpi.

¹⁷Bidi ke nangkai parengme un lapen la pen nangkeja pajok-van un.

¹⁸Kere keplanglong atum rengme; bidisi latum aphan chethe pipo.

¹⁹Alangli bidi pensi HEMPHU pirthe thip-lo; Alangli gian pensi inghun-asining adim bilo.

²⁰Alangli gian si langroi-heihei palilo lapen pirthe athak inghun-heihei si arve pajangtoi lo.

²¹Nangbidi lapen lam-acho chebi-pamenon, sopo. Nangpen lahei pachekak longri.

²²Lahei nangphan chethe nangpipo-isi kerengme lapen ning-arong akai.

²³Nangtovar nang kedam jokvanpo lapen patekungkelo.

²⁴Nangmek kejangdam ahut seta nang phererelo, lapen jopangthang nangmekjanglong pamepo.

²⁵Kehingno abangphan tomonthepi ason kevang tongsekot akesung kevang aputhak seta nang matha chepasung nangnelo.

²⁶HEMPHU-si nangphan nangpajok po. Alangli nangphan hilik arlo paklo longledet po.

²⁷Un an nang, la akemang atum aphan keme akam klemnon.

²⁸Nang jongsi non rap dun un pulote nangdung abangphan penap an panghongrinon.

²⁹Nangdung abangphan aning kepa-oi ason thangta keklemji mangri; alangli aning nangchethesi nangdung dolo.

³⁰Nangphan jongsi nangpasungse pulote athe avepin pen badu pen tame lam chedan dun nangne.

³¹Kephangno amonit aphan lang un-e rinon mate halatum keklem ason klem dunri,

³²pima kehingno keklem abangphan HEMPHU hijimlo, bonta dhoromi atum aphan alangli ningchethe-o.

³³Kehingno amonit ahem-heihei aputhak HEMPHU ahirjuno pilo, bonta dhoromi atum ahem aputhak pahirmelo.

³⁴Kepinrem atum alangliphan thang ale ave, bonta asotdut abangphan alangli kangjinso paklang-lo.

³⁵Kereset amonit atum anong kejume longpo, bonta kelu amonit atum halatum amethang aputhak kelangrem chobat dun po.