Read Karbi SARLAMTHE 30 Bible Online

SARLAMTHE 30 - Karbi bible

SARLAMTHE 30

¹Massa asor Jakeh asopo Agur alam lahei helo: “Arnam nelong ave, Arnam nelong ave, lapen ne rap abang ave .

²Chenamsi ne monit pu kechekrongji aphan jok-lu-ong-lo. Ne monit ateng kechinithek avedet-lo.

³Ne bidisore charli det-lo, mate Kangthir Abang aphanta chinine det-lo.

⁴Komatsi sining arlu damsi nangsunthulo? Komatsi tomon aphan ari pen tumchek-lo? Komatsi pe pen lang keperhet-lo? Komatsi pirthe ahoi bitang-lo? Alangli amen kopilo, lapen alangli sopo amen kopilo? Chenamsi nangli chinima?

⁵Arnam alamthetin ahok pu ang-thek do; Alanglilong kechepachong atum aphan la chong-lo.

⁶Alangli la along chobatdun ri, kalite la nang-ingchek po, lapen nangphan chobei abang pupo.”

⁷Ne nangliphan sonni hang-lo; ne kethi aphrang lahei nepinon.

⁸Kepachorei lapen kechobei nepen pahelonon, kedukta keplangta nepiri nephan akenangji a-an pen nepacho-longnon.

⁹Ne dorphlup lote nangphan tengnedet tahai, lapen nepupo, “HEMPHU komat-lo? “ lapen ne dukvok lote chonghudet tahai, lapen ne Arnam amen pahijimdet tahai.

¹⁰Ahemphu angno aban anong josi, nangphan la ahirjuno nangpira la pen apot nang sungnang apot-lo.

¹¹Apo atum aphan kanghon atum lapen apei atum aphan kepahirjumeme atum do.

¹²Amek angden ingthir-et pu atum do, bonta halatum kehijim ason chechamchelang.

¹³Ajehak atum me-o pusi kechethek, latum akematha mepiksi kechethek!

¹⁴Ajehak atum aso nokjir lapen tari asonsi pirthe kehelo kedo-an aphan lapen monit angbong keboi aphan kejoilutjilo.

¹⁵Ingphat asopi banghini do; “Bang-hinita, nepitha,” pusi latum amen hang-lo. Sonthom amar kaita aning ingsamse; Phli kaita “dorlo” pupe:

¹⁶Chom, aso-kave apok, longle kaita lang ing-itver lapen me kaita “dorlo” pupe.

¹⁷Apo aphan kepinrem amek lapen kepakroijira apei aphan kelangrem amek arlok avo-ak atum horjokji lapen takun atum chodetpo.

¹⁸Sonthom ne kemanghumeme amar do; phli ne chinithekthe:

¹⁹sining inghun angsong ke vomu atovar, arlong athak pherui atovar, talo athak telongpi atovar, lapen monit ahem kedodun a-osopi pen kechoklem akam.

²⁰Lason helo inut beisapi atovar: bangpi chongni, lapen angho cheven, lapen pulo, “Ne thangnatta kehingno klemkle.”

²¹Sonthom pen ajok pirthe klemhur, sonphli apot la chechak un-e:

²²Ban abang recho nangplang-lote, kelu abang kecho ason dopik-lote,

²³Aning kedok abang kavepin a-arloso apenan chelong-lote, lapen banpi ahemphi adim cholong-lote.

²⁴Pirthe athak sonphli amar bihek, bonta latum akere litdong;

²⁵Miso atum kangtang-o asong kali, seta barla esek aphan latum a-an chepadorthek;

²⁶Konni api atum ajakong kethe-o asong kali, tebonseta latum arlong ajosi ahem do;

²⁷longvur atum arecho ave, tebonseta latum kedo-an isi asong dampet thek,

²⁸bilit nangri pen nepchek ta un, tebonseta la rechohem-heihei alongta do.

²⁹Sonthom amar kengkam kechejor ahir do-o, sonphli abang kedam ahir do-o,

³⁰Hingho, pi angbong kangtangnei lo lapen badu angno ta aphi chetevarve.

³¹Vo alo, lapen bi alo, lapen arat aphrang aphrang kedam arecho.

³²Nang chepalura nangne chepathe lo, mate kehingno keklemji rirok-lote nangho chedipthipnon.

³³Pima, mok-lang kangvui athu pinchong-lo, anokan tumrop-lote avi bu, lapen ningthivarret-lote chebohong.