Read Karbi SARLAMTHE 31 Bible Online

SARLAMTHE 31 - Karbi bible

SARLAMTHE 31

¹Massa arecho Lemuel aphan apei kethan alam:

²Po, ne kechopathevek a-oso, kopiloma? Ne kechechak aso kopi cheplang-loma?

³Arloso aputhak nang jakong padamtap-ri, lapen recho atum aphan kepavir atum aphan nangning chebiri.

⁴Lake recho atum aphan kali, O Lemuel, recho atum hor kejun chelonle, mate kepangri atum arak kejunji ar-i nangne;

⁵kalite latum junpo, lapen keparontang alam tengnedetpo, lapen kesung kepho atum ajakong phangnopo.

⁶Kevir atum aphan le hor-arak pinon, lapen matha kesungpik atum aphan ta hor;

⁷Halatum jun pen halatum akeduk patengne-lonang, lapen halatum akeduk chemathathedetpo.

⁸Alam kave atum aphan nang ingho chingpunon, lapen ke-otang atum ajakong aphan chedanpinon.

⁹Nangho chingpura ahokpet le ingsainon, keduk lapen keboi atum ajakong lang pamenon.

¹⁰Kemesen apiso komatsi longthek? Bangpi dorson-heihei apar ador somu.

¹¹Apenan bangpi aphan aning chethe-o, lapen alangli kelongji durere detji.

¹²La aphan bangpi akemesi klem, lapen bangpi akai arjon akehingno klemkle.

¹³Bangpi ul ahon lapen linen ahon ri, lapen aning aklong pen kam klem.

¹⁴Bangpi ke bepari atelongpi asonsi kehelo pen bangpi an van.

¹⁵Bangpi ingtingrim lote thur lo, lapen hem isi aphan an sikpi lapen banpi atum aphan kam adeng than.

¹⁶Bangpi hidi langsi bangpi ari hongni pen keklem aberi athesere anam pen la namlo.

¹⁷Bangpi kam keklem jakong kepadojisi avam chingtinret.

¹⁸Bangpi abeha akam ale do pu chechini. Ajo seta bangpi amelur mepme.

¹⁹Bangpi honki ari pen otsi takari pen jengbom.

²⁰Keduk aphan bangpi lang-o, lapen keboi atum aphan rapdun-o.

²¹Ar-e kelok athan pen ajok la ahem asangho atum aphan aning bibe, pima ahem asangho atum pe kar-om chepindeng-long.

²²Bangpi amethang areng-ahu aphan pe chethak lapen bangpi pe kanglit la hepi arong ape si che-um.

²³Mei-thai along bangpi apenan aphan det arlengkesar atum angbong kangnidun ahut chinipet.

²⁴Bangpi pe kanglit ape thaksi lahei jor, bangpi bepari aphan vamkok chejor dam.

²⁵Jakong lapen man pen bangpi chepindeng, lapen mo aphi akai aphan bangpi pherere.

²⁶Bangpi abidi pensi lam ningje, lapen kangjinso alamsi thanver.

²⁷Hem isi kerengji aphan bangpi langpame, lapen keselet pen an chochotche.

²⁸Asomar atum thursi bangpi aphan “hirjume atheng-lo” pusi ropo, apenan ta bangpi aphan ropo.

²⁹“Ongdung a-arloso atum mepik akam klemlo, bonta nang ke halatum kedo-an aphanta palit-et lo.”

³⁰Arje chepamechot ke pachoreilo, chepalangme ke malomso aphanchot, bonta HEMPHU aphan man kepithek a-arloso ke kero atheng-lo.

³¹Bangpi ari hongni pen keklem athesere bangpi aphan pacholongnon, lapen bangpi akam keme mei along anong pachethang-non.