Read Karbi SARLAMTHE 5 Bible Online

SARLAMTHE 5 - Karbi bible

SARLAMTHE 5

¹Sopo, nangno chedentha, lapen ne bidi lapen lam-acho anat nangno chedentha.

²Anke nang kosonsi kedo kethak pamethekjima chinipo, lapen nanglam pensi nang gian do pu cheklangpo.

³Anut kaprek amonit apiso alam pijo alang ason dokpik tahai lapen bangpi akangjup jit ajangthu ason naiphlot tahai,

⁴bonta la kadokave tang-et lote, bangpi nangphan keho lapen keso pen apar thangta nangtekang thekthe-lo.

⁵Bangpi nangphan ha chom apirthesi nangpondetpo; bangpi kedam atovar ke kethi atovar lo.

⁶Bangpi ke chethe atovar along dode; bonta kopi plang-loma chechinine pin pen damtap bomlo.

⁷Sopo, non nelam arjutha lapen ne kepu alam kaita tengneri.

⁸Lason a-arloso pen chepahelonon! Bangpi anghap adung damri!

⁹Nang klemlote, nang ephong kelongtang aman bang kapreksi long-rongpo, lapen kangjinso kavepin amonit arideng riso ahut nang thi nangkokpo.

¹⁰Kalang, kechinine atum nangkhi nangdat pon et po lapen nang keklemtang akam bangsi cheraidet po.

¹¹Nang kethi ahongplang athaksi nangkechiru dulur po, nang ok, nang artho-heihei cho et po,

¹²lapen nang pupo, “Kopisi ne charli thekthe det loma? Kopisi ne bang kaprek nepakeng toi longle det ma?

¹³Ne thanbang aphanta alam arjumolo. Lahei aphan ne no chevarve det lo.

¹⁴Lapen rat pen nephan menmen nekepatherak ne chethek long-lo.”

¹⁵Nang methang apiso aphan kekroi penle dopi-pame non lapen bangpi aphanle nangning dokchot tu.

¹⁶Bang kaprek a-arloso pen nang kelong asomar nangphan thang akeme vanve.

¹⁷Nangphan nangkeparapjile nang somar pathe-pading non, kechinine abangphan kali.

¹⁸Lasi nangpiso pen nangning cheparengme non lapen nang ke-en a-osopi penle nangning cheparong non.

¹⁹Thijok api ason kelangme lapen kangjinso plengset. Bangpi a-arje kephu nangning parongnang, bangpi akengkamle nangphan pakom-chennang.

²⁰Kopi athesi nang anut kaprek a-arloso aphan nang kanghon kepiloma, sopo? Kopisi nang bang amonit apiso a-arje keme nangning kedok loma?

²¹Nang keklem ason an HEMPHU nangthek long-lo. Nang konatma kedam Alangli nanglang dunkri lo.

²²Kehingno abang apap ke isi apham lo. La amethang apap along chingnang-lo.

²³La thinang-lo, pima la aning kechekhang ave. La kelu alam keningje ajoksi laphan tipit anat toiphit po.