Read Karbi SARLAMTHE 6 Bible Online

SARLAMTHE 6 - Karbi bible

SARLAMTHE 6

¹Bang apreng arpu nang chechak dunloma, sopo?

²Nangmethang alam nang kechak apot nangphan nangnep longchek loma?

³Mesen, sopo, nang halabangso amonit ajakong alongsi dolo, bonta lason klemra nang chepajok nangji: La along dam serak-ra, nangphan nangkelojile choningri damnon.

⁴Nangmethang amek pajang longri non mate pasang longri non.

⁵Vo ason mate thijok api ason kenep abang pen kechepajok asonthot pham pen chepajok non.

⁶Miso atum kosonsi keklem ma la pen keselet atum pacharlinang.

⁷Latum ajalin, akethe, mate kepangribang ave,

⁸bonta barla asek an risi ningkreng esek aphan an chebilo.

⁹Keselet atum ko-ansi hongplang athak ke-i apot loma?

¹⁰“Ne asap mekjangjilang,” pusi la pupo; “Neri chehinsi malomso sangjilang.”

¹¹Bonta la mek kejang bom ahut si keboi laphan risim kedo akanghupi ason tengkhengpo.

¹²Amovangve, kehingno atum pachobaisi dambom.

¹³Nangphan kepachobaijisi latum amek charvi lapen chekreng.

¹⁴Kehingno aning arlo kehingno akemang pensi plengset, bithe-bitha kepasungjisi chorung lo.

¹⁵Pima, latum aphan pacheretoite pin pen latum aphan kevir vangpo lapen latum areng sodak khangjang po.

¹⁶Sonthroksi ason HEMPHU hijimlo lapen chepaningding un-e.

¹⁷Ane chepathe ake-urong, kechobai ade, adai kave abangphan kepathi ari,

¹⁸kehingno kemangver aning, kehingno keklemji akeng kepachat,

¹⁹kepachobaitot ahaki kechodun abang, lapen jirpo angbong kechepasungtap amonit.

²⁰Sopo, nangpo kopima nangkepu lale klemnon, lapen nangpei nang kethan alam kai seta tengneri.

²¹Kaiketa halatum alam nangning chebinon, nangning arlo chethap pamenon.

²²Halatum akethan nang kedam ahut nangjapo, ajo nangraipo, lapen anerlo nangphan nangparepo.

²³Halatum kepinkhat alam-heihei kethe-ang atur lo; halatum kepakeng alam nangkosonsi kedonangjima nangthan po.

²⁴La nangphan kehingno a-arloso pen nangpahelopo, nangpajokpo.

²⁵Halatum a-arje keme pen asat chepaphori, halatum akangnek-ri amek along pham chingnang dunri.

²⁶Him eplang anam pen ajok inut amonit beisapi rong-un, bonta bang apiso pen keklem la kedo-an chepinang-et po.

²⁷Nangning athak me akri bat-ra nangchoi me chepachoche pin unjima?

²⁸Nangkeng me chepachochepin pen koila ame akri athak dam unjima?

²⁹Lasonthotsi bang kaprek apiso pen ke-i rap-rap pherememelo. La keklem bom abang kesung phoji.

³⁰Inut achonghu an kangchir ahut an chonghulote rat atum lapen la-an langrem nangne;

³¹Seta laphan jongsi nep-longchek lote, la batai throksi chepi nangji-la do-an che-o-et nangji.

³²Bonta inut beisa akam keklem abang thangnat matha thekthe. La amethangsi chepavirlo.

³³La aphan langrempo lapen chok po; laphan kaiketa pinrem po.

³⁴Inut apinso kelang un-e ahut apar aningkethithek avelo; la alar kehui ahoi ave,

³⁵Thangnat anamta la dengde; laphan jat adan-heihei le pi seta la aning kethi paham un-e lo.