Read Karbi SARLAMTHE 8 Bible Online

SARLAMTHE 8 - Karbi bible

SARLAMTHE 8

¹Arjutha! Bidi ke hangkong lo. Kechini athe amethangsi chepaduk-lo.

²Tovar adung inghong, angsong lapen tovar chetok along la arjap-lo.

³Rongsopi kelut anghap along, inghap-heihei adung la hang-lo:

⁴“Monit akhei, nangchoningrilo; pirthe athak abangphutin aphan ne nanghang-lo.

⁵Nang ingtangte langma? Charlira chepangtangrak non. Nang luvok ma? Kechinijile charlinon.

⁶Ne kejume alam arjutha; ne nangkethan alam an chokpet.

⁷Ne kepu alam an ahok; kechobei nehijimpar lo.

⁸Ne kepu asontin ahok; thangnat ta ahok-he mate kejapontap ave.

⁹Pinso aphan lam-acho pen, la pachinidak; Karjulongpame atum aphan la kengset.

¹⁰Rup alar nekepinkhat-le chongvainon, ajukave aser alar gianle chongvainon.”

¹¹“Ne bidi lo, dorson apar ne memulang, nangning kehang ason an, ne pen pangbar un-e.

¹²Ne bidilo, nelam-acho alongsi kedo; ne gian lapen kangsai ajakong do.

¹³HEMPHU aphan man kepi ke kehingno an kehijim helo; anekethe lapen kecheparoka, kehingno atovar lapen kechobei alam ne hijim par lo.

¹⁴Ne mang-lo lapen lahei paplang-lo. Ne kechini do, lapen ingtangrak.

¹⁵Kepangrijisi recho atum aphan lapen kemesen ason-heihei kepangri atum kepasengji ne rapdunlo.

¹⁶Pirthe athak abangphutin kepangri abang ne akerap pen pangrilo, jalin atum lapen arlengkethe anta.

¹⁷Nephan kanghon abangphan ne chinghon, nekeri abang nephan nelongji.

¹⁸Keplangkephi lapen man kepiji nelong do, kechingthur lapen ke-un anta.

¹⁹Nephan nang kelongji ke ajukave aser an sose kemeji, ajukave arup an sose.

²⁰Ne dhoromi atovarsi damlo; hok-kangsai atovarsi ne damlo.

²¹Nephan kanghon abangphan ne akhi pilo, ahem-heihei akhi pen plengset.”

²²“HEMPHU kechengsi nephansi nethip-lo, hako ahut alangli kechengsi akam.

²³Kechengsi nephansi nethip-lo, aphrangsi, pirthe kethip aphrang.

²⁴Talopi-heihei aphrang nesi mahang thek paphrang-lo, halaso ahut lang amek-heihei avepinlang.

²⁵Inglongpi-heihei aphrang ne si mahang thek paphranglang, inglong-heihei bibe aphrang.

²⁶Arnam pirthe lapen la hidi-heihei mate longle thipthe aphranglang.

²⁷Alangli inghun-asining adim kebi ahut ta ne dolo, talopi athak alangli chubong bat-lo,

²⁸Alangli inghun-heihei asining adim kebi ahut, talopi alang amek-heihei kangpu ahut

²⁹talo alang-heihei aphan hukum pilo, la kepu apar karluledetji aphan pirthe ahemthur-heihei kekim ahutta ne dolo,

³⁰Inut kekimthek abang asonsi ne Alangli dung dolo, Ne alangli aning kecheparong atirilo, alangli ingno ning arongverlo.

³¹Pirthe pen ning cheparong-lo, lapen monit akhei aphan ningdok-lo.”

³²“Non, riso abang, nelam arjutha. Nekepu ateng klemnon, nang rengmepo.

³³Nangkethantang alam no chedennon; chepareset ra, la langkrangrinon.

³⁴Nelam karju abang ke rengmeji arnivangta ne inghap along kesaver amonit, nehem ajakan along kanghong abang.

³⁵Nephan kelong abang chethe longji, lapen alangphan HEMPHU aningdok-opo.

³⁶Nephan nekelongle abang amethangsi chephangnolo; nephan kehijim abang kethi aphan inghon lo.”