Read Karbi THANPARE 1 Bible Online

THANPARE 1 - Karbi bible

THANPARE 1

¹Jerusalem arecho, David asopo, gian keri abang alam lahei helo.

²Lahei thangta ale ave, ale ave pusi gian keri abang pulo.

³Arni arum monit atum keklem keklem chepaduk ale kopi long-lo.

⁴Ove dambomlo lapen ove vangbomlo, bonta pirthe kai ateng dover.

⁵Arni vang-lo lapen arni chilo, lapen tongsermongsi la kevang adim chedamthu.

⁶Nitur anat tomon jap lapen Nirep anatta japdam; tomon kejap artingbomsi la karting pavaikangsi chiruithulo.

⁷Langjeng do-an talosi damlo, bonta talo plengple, langjeng kangbop adim latum ledamthulo

⁸Kedo-an asonta kelaknangsi plengset; inut amonit la than-et un-e. Mek kelang pen chepangsam un-e, no ta arju dorde.

⁹Keplangtang aronsi plangbompo lapen keklemtang asonsi klembompo; lapen arni arum thang akemi ason ave.

¹⁰“La langnon, akemilo” pu kepu ason doma? Ilitum aphrang hako penta la dobomlo.

¹¹Aphrang ason-heihei chekimo abang avelo, keplangji ason-heihei aphuthakta chekimo abang avedetpo.

¹²Ne than-parebang Israel aphuthak Jerusalem along recho cholo.

¹³Lapen ne pirthe athak keklemtang an ason bidi pen kerijisi nening paklong-lo; monit asomar atum aphan Arnam kepaklemthuvoi lake isi kerengmeme akamlo.

¹⁴Arni kopisi klemtang-loma ne thek-long-lo; lapen langtha, kadokave ale ave lapen la tomon aphi kechohung dunchot ason.

¹⁵Kekdang ason pakeng un-e, Lapen kave amar lakha thekthe.

¹⁶Nemethang chepulo, “Ne bidi kethe longtang-lo, ne ingno Jerusalem along kedo-an aphan litsong-lo; lapen nening bidi lapen gian kethe do an thek-lo.”

¹⁷Lapen nening bidi lapen kelu akeprek kechinijisi paklang-lo. Ne chinilo, la seta tomon aphi phi kechohung dunchot asonlo.

¹⁸Ko-an nang bidi dolo, hala ansi nangning oipo lapen gian chepa-ongbom abang, akesungta ongbom.