Read Karbi THANPARE 2 Bible Online

THANPARE 2 - Karbi bible

THANPARE 2

¹Nemethang chepulo, “Vangnon, kerengme asat chomatjilang; ning-hang aling ne klempo.” Bonta langnon la jokta ale ave.

²Kangnek pangtar aphan ne pulo, “Lake kepangcham” lapen kecheparengme aphan, “La kopi ale kedo?” Pusi pulo.

³Nening pen ne kosonsi nening cheparong thekjima ne drakha ahor pen lapen apor keme ke-en pensi klemlo. Ne mathalo, pirthe kerengji apor thihek along monit atum kerengnangji la helo akemenei atovarlo.

⁴Ne kam kethe-heihei patang-lo. Nemethang aphan hem-heihei kimlo lapen drakha arong-heihei elo.

⁵Ne mar aberi lapen beri along thesere arong elo.

⁶Ne langteng hutsi lang hadak padolo.

⁷Ongdung aban lapen ne hem arlo mahang kethek aban ne namlo. Aphrang pen non anta Jerusalem along kedotang atum angbong ne kechepahemphu api ongneilo.

⁸Ne kepangri adet along recho akhipuru pen ser-rup pangrumlo. Pinso-arlo nening keparungjisi lun lunlo, lapen inut apinso kenangji an a-arloso ne longpet-lo.

⁹Ahok, ne the-olo, Jerusalem along kedo atum angbong an aphante ne theneilo, lapen ne bidi nephan kaita o-e.

¹⁰Ne kenangji ason an ne long-lo. Ne kecheparengme ason pen methang aphan khangkhelo. Ne keklem akam asontin pen ne chechak-lo, lapen la do-an ne kelong anong-elo.

¹¹Ansi ne keklemtang akam an aphuthak mathalo, lapen ko-an ne la keklem chepaduk nang loma, lapen ne chinilo la thangta kali. Lake tomon aphi kehungdun ason, thangta ale ave.

¹²Jat seta, recho atum keklemtang akam rechosi klem un chotji. Lasi kere mate amokevangve mate kelu athe kopima la aphuthak ne matha pangcheng-lo.

¹³O! ne chini, kethe-ang ke kangting aphan kememu ason, bidi ta kelu apar memu.

¹⁴Kereset amonit atum halatum konatsi kedamloma chechini bonta kelu atum chinine. Bonta ne chini lasonthot akopai etum abangphutin aphanta plangthek.

¹⁵Nemethang chemathalo, “Neta kelu atum akopai asonthotsi ne ta longle.” Ne thak-lo, “Eson natta longle.”

¹⁶Badutame kereset abang aphan chemathathe lapen kelu abang aphan seta baduta chemathathe, kevangji arni eli do-anta tengnedetpo. Kereset lapen keluvok abang jokta thinangvekji.

¹⁷La apotsi kai nephan thangnatta kali, pima la kedo-an nephan thangta vanvedet-lo bonta kesungsi vanlo. La kadokaveta ale avetang-lo, lapen ne tomonsi hungdunchot-lo.

¹⁸Ne keklemtang lapen kepangrum-tang akam nephan isibak ale dolo lapu kali, pima ne chini lahei nephi a-ove aphan otekang nangji,

¹⁹lapen halabangso reset tahai mate luvok tahai mat chini? Jat seta ne keklemtang amar an, ne bidi pen nephan kechepangrum amar an la chepahemphupo. La kedo-anta ale ave.

²⁰Lasi ne kechepaduktang akam along ning-oi lo.

²¹Nang eson akam aphan nang bidi, gian lapen asai do-an pen si klem, lapen la do-an nang anut kaprek kam chepadukdepin abangphan otekang nangji. La ale ave, lapen la chokche.

²²Nang kam klem lapen nang kai isi atovar angbong ningri nang, lapen la aphan nang kopi paklang thekpo?

²³Nang rengtik an, nang keklem ason an thangnatta vanve bonta keningri lapen ningkeso, ajo seta nangning sangjoithekthe. La seta ale ave.

²⁴Inut amonit kemenei akam keklem unji ke kecho-kejun lapen kepangrum an amar pen aning chepajang. Tebonseta ne chinilo la jokta Arnam pensi kevang.

²⁵Kopi ason pensi nang kecho mate nang methang aning chepajangthekpo?

²⁶Arnam aning kepangsam abangphan alangli bidi-gian lapen kerengme pi, bonta alangliphan aning kepangsam abangphan kepijisi papi atum aphan kam paklem, papangrum, lapen pachobirti. La kedo-an ta ale ave. Lake tomon aphi kehungdun asonlo.