Read Karbi THANPARE 3 Bible Online

THANPARE 3 - Karbi bible

THANPARE 3

¹Laso apirthe keplang asontin, Arnam kangvaitang apor si plang-lo.

²Mahang kethekji lapen kethiji apor Alanglisi pathik-lo, Isi ke-e apor, lapen kephur apor,

³Kepathi apor lapen kepame apor, kephri apor lapen kekim apor.

⁴Isi ningduk apor lapen ning-arong apor, Isi kechiru apor lapen isi kekan apor Alanglisi pathik-lo.

⁵Aning kechedok apor lapen aning kechedokde apor, isi kechingjup apor, lapen kechingjupje apor.

⁶Alanglisi kelong apor lapen kepangbo apor pathik-lo, kebirti apor lapen kepadam apor,

⁷Kangsek apor lapen keroi apor, kedojoi apor lapen kechingki apor pathik-lo.

⁸Kanghon apor lapen kehijim apor, ron apor lapen kepangsam apor Alanglisi pathik-lo.

⁹Eli kam keklem an pen kopi ale long-loma?

¹⁰Ne chini, Arnam etum aphuthak ko-an akardik arpu-heihei epi loma!

¹¹Asontin aphan alangli kechok-lim apor pathik-lo. Mo aphi alam kechiniji aphan alangli ening pahang-lo, bonta alangli kopi klemloma kechini pameji eningkehang paplengple.

¹²Lasi ne chinilo, eli keklem unjike un-an ningcheparong lapen pirthe dotik an kemenei akam keklem helo.

¹³Elitum do-an chonangji lapen junnangji lapen eli kopi aphansi kam keklemloma ning chepajang nangpo. La Arnam adanlo.

¹⁴Ne chini, Arnam keklem ason an kaiketa dover. La along nang thangta bat un-e mate lapen nang thangta pon un-e. Lapen eson akam Arnam keklem ke eli alangli ingno kephere pen karjapthekji aphan.

¹⁵Kopipisi plang-loma mate keplang unji lake aphrang plang-et-lo. Mo aphithu seta eson natsi Arnam paplangthubomji.

¹⁶La apar, pirthe athak ahok akangsai lapen kechokpet nangji adim kehingno ne thek-long-lo.

¹⁷Neme-thang chepulo, “Arnam dhoromi lapen kehingno aphanta ingsaipo, pima amartin, akam asontin la amethang apor ahut plang-lo.”

¹⁸Ne rip-lo, Arnam etum aphan asat elang-lo, elitum aphan akeme anat thangnatta lit-le.

¹⁹Jonghe seta eson-nat akopaisi monit lapen pi aphan inghongding-lo. Akaprek asonthotsi la ta thi. Halatum ejatvet api. Monit pi apar thangnat akeme ave, pima chethe la hini aphanta ale ave.

²⁰Halatum elongvet adimsi damji, lake longle aduk along. Halatum la pensi vang-lo; latum la alongsi chedamthupo.

²¹Kosonsi ejon api akarjong longle arum kedam ahut inut amonit akarjong angsong damlo pu chini unpo?

²²Lasi ne chinilo, kemenei ason ili keklem unjike ili kam keklem unji ason thangta ave. Ili thilot aphi kopi plang poma la kechiniji thang atovar ave.