Read Karbi THANPARE 5 Bible Online

THANPARE 5 - Karbi bible

THANPARE 5

¹Kardom ahem kedam ahut cherenangji. Kelu mate me-hingno kechinine keklem atum ateng athok-heihei kepi mute hadak kecharlidam memu.

²Keningje aphrang mathapametu, lapen Arnam aphan semetang tong nangne. Alangli ke sining angsong lapen nanglike pirthe athak sido, lasi nang keningje nangji pen apar ningje nangne.

³Nang ko-anma keningje la-ansi nang manglangno thek-longpo, lapen ko-ansi nang lam ningjejima la-ansi nang kelu alam nangbarpo.

⁴Lasi nang Arnam aphan semeke-tang ahut, un an la paplengnon. Kelu aphan alangli rimre. Kopima kechechak lale klemnon.

⁵Chechakdet pen klemkledet mute chechakchedet si akeme.

⁶Nangmethang alam-heihei nangphan pap anat nangpajajenang, lasi nang Arnam akurusar aphan lale ne kepu kali pu kopisi Arnam nangphan aning pathi nangpo? Nang keklemtang akam an kopisi alang pavirnangji.

⁷Nang ko-an mangheman tame, nang ko-an ale kave akam klem seta mate ko-an nang lam ningje seta, nang Arnam angno ok-klemhur pen arjapvek nangji.

⁸Detpangri jongsi keduk atum aphan chenek-lo lapen halatum aphan ahok-he ingsailo lapen kelongnangji ajakong-heihei kepavir ahut nang manghu nangne. Anu-ttin achakri aphan chakri kethe si railo, lapen halatum banghini aphanta chakri kangtui atumsi railo.

⁹Recho jokta saiketiki aputhak si ningkethe.

¹⁰Nang jongsi tangka inghonlo pulote, nang kaike seta ning ingsam un-elo; nang jongsi keplangji ninghang-o pulote nangning kehang ason kaike seta long un-e. Lata ale ave.

¹¹Nang ko-anma keplang, la-ansi nang pangkrang nangpo. Nang ale kechelongke nang ko-an plang-loma pu kechini agian an helo.

¹²Inut kam keklemvoi abang dorphlup kechoji aphan avedet tahai bonta la jonghe seta amek janglongpameji. Inut keplang abang do-o seta alangli amek jang thekthesi ningrinangji.

¹³Ladak helo ne kepherememe ason pirthe athak kethek-long. Tangka kenangsot ahutsi monit atum tangka chobirti,

¹⁴ansi la kopai kelangno kethekthe ajok chepangbopo lapen halatum asomar aphan pamotekang longlepin pen avedetpo.

¹⁵Ili dak pirthe along kevang ahut thangnatta vanvedet asonsi kedam ahutta ri angse si damnangpo. Pu-an ili kam keklem chepaduk seta ili thangta chepon un-e.

¹⁶La ahok kalima? Etum kevang ahut asonsi damnangpo. Etum kam chepaduk, tomon kenepji kehungdun ason, lapen etum kopi long-loma?

¹⁷Etum kangting akai ningduk, keningrinang lapen keso pensi kedonang.

¹⁸Lahelo ne kelongtang ason inut aphan akemenei akam ke kecho lapen kejun lapen Arnam ekepitang akai kethihek ahut kam keklem chepaduktang ason pen ning chepajang; la helo monit alekha.

¹⁹Jongsi Arnam inut aphan akhi-adat pilo, lapen la aphan amar pen ningchepajang, alangli choronangji lapen la keklemtang ason pen ningchepajang nangji. Lake Arnam pen kelong adanlo.

²⁰Arnam si laphan parengmetoilo, la apotsi kai kethihek aputhak seta ningri nangnelo.