Read Karbi THANPARE 7 Bible Online

THANPARE 7 - Karbi bible

THANPARE 7

¹Isi anong kejumedong lake adorkeso ajangthu nempru aphanta memu; lapen nangmahang kethek arni aphan mute nang kethi arni memu.

²Isi kecho-kejun amei along kedun aphan mute edon ningduk-ninglak ahem kedam memu, pima netum kedo-an aphanta kethi kaike inghongding-lo pu chemathaver nangji.

³Kangnek apar ningduk memu; La nangning pa-oi tahai, seta la nangning paremuchotji.

⁴Badutame kaike kerengme aphan kematha lake inut kelu abang-lo, Kereset abang kethi alam matha-o.

⁵Kelu atum nangphan kelun kero mute kereset atum akangchek memu.

⁶Kelu abang kangnek lake me angkang ajo ingsu kangbop ason. La kangnek athe ave.

⁷Inut kereset abang bang aphan chobeilote la kelu abang asonsi klem. Nang jongsi rosopot deng-lote nang nang-ot chephangnolo.

⁸Jat asonta kecheng aphan mute kejut langmemu. Kechepaningding ke kechepindak aphan memu.

⁹Ning kesedeng chekhang nangji, pima kesedeng ke kelu atum alongsi kesa.

¹⁰“Oh! kopisi hako ahut amar non aphanta kememulo?” pu arjuri, la kereset akarju kali.

¹¹Kerenglang atum anut-tinta reset nangji, lake apo amar kechepahemphu akeme ason lo,

¹²lapen tangka ko-anma nangkerai un la-an nangraipo. Bidi nangphan pajok, lahelo gian ale.

¹³Arnam kopi klemtang-loma mathatha. Arnam kepakektang amar komatsi pakeng unpoma?

¹⁴Nangphan arni keme ahut ning cheparongnon, lapen kesung kevang ahut, chema-thanon: Arnamsi kerengme lapen kesungta nangtoilo. Aphi kopi plangjima nang thangta chechinine.

¹⁵Nekai thangta ale avepinlo, bonta la ne asontin thek-long-lo. Kemesen abang thilotsi kehingno abang reng-et tahai.

¹⁶La apotsi mepik nangne mate repik nangne, kopisi nangmethang akai nang chepathi nangpo?

¹⁷Hing-nopik cheplangri, lapen kelu abang cheplangri, nanghut chokche akosi kethi nangji athe kopi?

¹⁸La sonni kelitdong pen chepahelonon. Nang jongsi Arnam aphan phere pulote jongheseta nangkai keklem ason chunvekji.

¹⁹Erong arongsopi aphan bangkep kepangri atum keklem mute inut bidi pen keklem abang memu.

²⁰Pirthe athak akechokpet keklemver lapen kaike kechokche klemklepinlang pu kepu abang ave.

²¹Monit atum asontin kepu ason nangno chevar dunri, nangban nang-phan nangketam charjulong-lok tahai.

²²Lapen nangmethang chechini nangji, nangjokta akaprek ongdung aphan tamlo.

²³La kedo-an asat kelangjisi ne bidi ot-lo. Ne keresetjisi mathathip-lo, bonta la nepen heloving.

²⁴Kai kopi la komatsi chini-un? La etum aphan kechiniji arsiklui.

²⁵Bonta nemethang gian lapen kecharliji aphan apor chepilo; ne bidi kelongjisi lapen karju ason kelongji aphan, kehingno lapen kelu atum akam kopima kechinijisi mathathip-lo.

²⁶Kethi apar kehonei ason ne long-lo, lake arloso. La kepajir akanghon lake pham mate lan asonsi nangphan nangnepji; lapen la nangphan nangkebam ingchin arri asonsi nangphan ingnangpo. Inut Arnam aningkehang kepapleng abang jokji, bonta papi aphan la nepji.

²⁷Ahok-lo pusi gian keri abang pulo, ne akethek-heihei keri un ahut asap-asapsi la long-lo.

²⁸Ne akaprek akethek rilo seta longledet-lo, suri angbong inut apinso ne man kepimeme long-lo seta arloso angbong long-le.

²⁹La kedo-an ne kecharli longtang-lo! Arnam etum aphan athikpet lapen kengsetsi epinchong-lo seta, eli methangsi la chepakekdang-lo.