Read Karbi THANPARE 8 Bible Online

THANPARE 8 - Karbi bible

THANPARE 8

¹Kereset abangsi athe alam chinichotji. Bidi laphan amahang paklarborji lapen keduk pakakji.

²Recho kopi paklemtoima la kroinon lapen Arnam aphan seme ketang paprap-ri.

³Recho aning-kehang aling klem un lasi la angno pen chepahelonangji. Lapuson kepherememe adim do-ri.

⁴Recho jakong pen kamklem lapen baduta la kopisi keklemloma pudun un-e.

⁵Nang alangli ketoi akam klemtik an nang jokvanji, lapen inut kereset abang koson lapen komantu ahutsi klemnangjima la chini.

⁶Asontinta keme apor lapen keme atovar pen keklemnang apordo, bonta elitum kechini asapvet.

⁷Etum do-anta kopi plangjima baduta chinine, lapen ethan abang ave.

⁸Baduta kethi pen chepahelo thekthe mate kethi arni pavedet thekthe. Lake isi eli chepajok un-epin aronlo; etum atovar chepachobei un-e.

⁹Pirthe athak keklemtang an akam aphuthak kemathadam ahut lahei thek-long-lo, isivet apirthe along ajehak amonit atum ajakong do, lapen latum aber kedo akaprek atum kesung chechaknang-lo.

¹⁰Kehingno amonit athiri along kepip thek-long-lo, bonta thiri pen tovar kecherui ahut halatum kehingno akam keklem arongsopi pen rat atum la aphan kero thek-long-lo. Lahei ale ave.

¹¹Kopi athesi monit atum pu-an kepathiji aning chepathir loma? Pima kepathi abangphan adukpi paprap-predet apot.

¹²Inut apapi bang pharo aphan pathilo seta reng-longbom. Oh! ahok, halatum kopisi kechepuma ne chini, “Nangjongsi Arnam aphan kroilote jat ason seta mesenji,

¹³bonta la kehingno atum aphan meme. Halatum akai isi harchi abin ason lapen latum bihek arta ahut pensi thiji, pima latum Arnam aphan kroikre.”

¹⁴Bonta la kematha thekthelo. Langtha pirthe kopisi plang-loma: Ahut pen ahut kehingno abang pen dhoromi abang aduk phonang lapen dhoromi abang kelongji anong-e kehingno abang longrong. Ne pulo, la jokta ale ave.

¹⁵Lasi ne chinilorlo, inut amonit amethang un-an aning chepajangnangji, pima laso akai akerengme lake kecho-kejun lapen amethang aning kechepajang helo. Dak pirthe Arnam kepi akai anke la kechepaduk ason klem unji.

¹⁶Ne reset abang kemanji aphan kebor-i lapen pirthe kopipi plang-loma, kecharli ahut chinilo, nang nerlosini lapen jopangthang mekjangjepin pen do seta Arnam kopi klemloma la nang chini un-e.

¹⁷Nang un an chepaduk ra bor-i seta nang long un-e. Kereset atum chinilo pu chepu seta latum un-e.