Read Karbi THANPARE 9 Bible Online

THANPARE 9 - Karbi bible

THANPARE 9

¹Ne kematha ajirdingkluilo lapen lahei kechiniji sung-o, kereset lapen dhoromi amonit atum akam, halatum akanghon lapen akehijim anta Arnamsi kekhang thek-long-lo. Badutame aphrang alam pi plangjima chinine.

²La thangta paprekpre. La esonnat akopai dhoromi lapen kehingno, mesen lapen kememe, dhoromi kerim atum lapen kerimre atum karkli kethok lapen kethokthe atum aphuthak vang-rappet-lo. Inut mesen abang inut papi abangphan thang keme-o ave, inut seme ketang abang, inut keklemkle abangphan thang akeme-o ave.

³Isivet akopai kedo-an aphan seta isinat-lo, lapen lake isi pirthe along keplang asontin akechokchelo, monit rengtik ke, halatum aning kehingno lapen kepangcham pen plengset, lapen halatum menmen amat thilot.

⁴Bonta kerenglang atum angbong mane abang pirthe athak ningkethedo; kethitang kehingno mute ejon kereng-et amethan memu.

⁵Ahok-lo, kerenglang abang thiji pu chechini, bonta kethitang abang thangta chinine. Mononphi nong-e kelongji halatum aphan avelo; halatum tengne koilo.

⁶Halatum akanghon, halatum akehijim, halatum akangtung-heihei do-an halatum kethi along thi-et-lo. Pirthe keplangbom along halatum thang akamta kerapdun avedetpo.

⁷Nang an chechobomnon lapen chehoknon; nang drakha ahor alang chejun-ra ning cheparongnon. La Arnam seta kroi.

⁸Kaiketa chepa-rengmenon lapen chehoknon.

⁹Pirthe athak Arnam nangkepitang ale kave akai un an nang kechinghon a-arloso pen kai ning chepajangnon. La ale kave arnivangta ning chepajangnon, pima nang kechepaduk pen la-ansi nang long unchotji.

¹⁰Nang keklem asontin akam chepaduk pen klemtu pima thidet aphi akam avelo, matha thekthelo, gian avelo, bidita avelo lapen ladaksi nangta dambomlo.

¹¹Ason kaprek ne chinithulo, dak pirthe kekat keprap atum kekat chepate along haidunverve, lapen angthin kethe abang ron haidunverve. Kereset atum kaike chepareng thekverve, kematha thekser atum kaike plangverve, lapen ke-un atum kaike kangtui anghoi-heihei arlulongverve. Kehingno akopai kadokave aphanta plang.

¹²Nang apor kevang ahut nang thang chechinine. Pham along vo atum kechedan ason, lan along ok kenep asonsi apor kehingno ahut eliphanta lahei eli kemathathe ahut edanchekpo.

¹³Bidi aphan dak pirthe kopusonsi kelangma ne thek-long-lo.

¹⁴Monit ong-epin arongsopi isi dolo. Inut ingtangrak arecho la tengkheng-lo. La kompetsi paisong kephangnoji chesik-lo.

¹⁵Inut dukvok abang hadak dolo, bonta la repik apotsi la rongsopi aphan pajok-lo. Seta baduta la aphan mathathepin.

¹⁶Ne kaita puverlo, jakong aphan mute bidi memu, bonta keduk abang akere baduta mathadamde mate la kepu alam baduta ano chevarve.

¹⁷Isi kelu atum amei along kehangtar kepangri abang alam mute inut kereset abang alam-heihei karjudunjoi memu.

¹⁸Risim aphan mute bidi memu, bonta inut apapi abang keme ason pavir-o.