Read Karbi SOLOMON ALUN 3 Bible Online

SOLOMON ALUN 3 - Karbi bible

SOLOMON ALUN 3

¹Ajovang nemek jangseta neningkedok abangphan nemang hemanver; Ne alangphansi ribom, bonta alangphan longle.

²Rongsopi angbong ne ridamlo, la atovarpi-heihei alongta rilo. Nening kedok aphansi ne ribom ne langbom, bonta alangphan thek-longle.

³Rongsopi kehon atum ne thek-long-lo, halatum aphan ne arjulo, “Neningkedok abangphan thek-longma?”

⁴Ne halatum aphan odet aphi, ne alangphan long-lo. Nepei ahem nemahang kethek adim angdeng along alangphan nepondetdetik an ne alangphan bamhetsi padamlongledet-lo.

⁵Semetangnon, Jerusalem a-arloso atum keprapjin athijok api lapen jok-luso amen pen netum nening kechedok along khamkhedundelo pu semetangnon.

⁶La kejejangtang ajo pen mehi angpong ason kopisi vangbon loma? Kedokjin amephik lapen hijung aphik angnim beha keklem atumsi kejor.

⁷Solomon vangbomlo, amethang anghoi cheponlo; bang throk-kep raikom nokbe atum Israel angbong kethenei anokbe atum.

⁸Latum do-anta nokjir pen chedanthek halatum ron kechedan kecharlitang atumlo. Anut-tinta nokjir pensi ajo ketengkheng pen keraiji aphan chesik-lo.

⁹Solomon Recho kemenei athengpi pen keselam anghoi cheponlo.

¹⁰La anujok-heihei rup pensi ketop; laso athak ser ape pensi keroi. La anghoi hepi arong ape Jerusalem a-arloso atumsi langmesen pen thak-lo.

¹¹Zaion a-arloso atum vangnon, Solomon Recho nanglangnon. Alangli ning arong lapen kechehoknei arni alangli pei alangli pisopangri ahut kekup aphutupsi chekup-lo.