Read Karbi SOLOMON ALUN 4 Bible Online

SOLOMON ALUN 4 - Karbi bible

SOLOMON ALUN 4

¹Nang ko-an kelangme, ne kechinghon abang nangmek nangmahang kedip ape anung anat kanghon pensi turbong-lo. Gilead anglong-heihei along bi ahur kechonphro asonsi nangchu kanlo.

²Biresak angmi ingtipdet pen vangmirak angmi kelok asonsi nangso lokbong-lo. Ehongta jokje, halatum chingdontai.

³Nang ingtur chu kekok ari ke-er asonsi nang lam keningje ahut la langmepik. Nang mahang kedip ape pen nang ing-om turbong.

⁴Nangchethok David apaisong ason, bong-longdir lapen naibong. Suri suri achong la along kevekdong isi alek ason.

⁵Nangchubong-heihei jok-lu api pindong ajo aso cherop aphan mok kepachu ason.

⁶Adap amonjir vangvetik lapen kangting damdetik mephik anglong hijung aphik anglong athak ne doverji.

⁷Nang ko-an kelangme, ne kechinghon abangpi, ko-an nang kechokpet!

⁸Nephan kedoji abangpi, Lebanon anglong pen nelong vangnon. Amana anglong kangtui pen nanghirnon, hingho lapen bongkrui kedo adim Senir lapen Hermon anglong pen vangnon.

⁹Neningkedok abangpi lapen nekedoji abangpi, nangmek kelang lapen kechingthang alek nening chonghupondet-lo.

¹⁰Neningkedok abangpi, nekedoji abangpi, nang kanghon neningparong-lo, drakha alang aphan mute nang kanghon memu. Kaprek mosola aduk aphan mute nang kenempru kedokjin angnim memu.

¹¹Ne kechinghon abangpi, pijo alang kedok nang ingtur along dolo. Nangde ke nephan chulang lapen pijo alang binong-lo. Nangpe along Lebanon edokjin angnim an dolo.

¹²Neningkedok abangpi, nekedoji abang ke isi aberi ason apai dohet aberi, parlopame alang amek;

¹³hadak thengpi keplang adim, Halatum dalim arong aberi ason thesere arong thebom lapen kemenei athe pathe. Hadak ri chimi kechehi athengpi lapen chap atheng-jangthu nempru do.

¹⁴Ruteng ajangthu nempru, pridok, thengkeching ajangthu mate asontin hijung amephikta do. Hijung aphik lapen thengnempru pen kaprek kaprek nemprujin arong hadak chanlo.

¹⁵Lang amek alang beri pachamsap-lo, Lebanon anglong-heihei pen nangkeli alangso men men nanglidung-lo.

¹⁶Nirep atomon mekprangnon, Nitur atomon ne beri japnon dokjin atomon penle paplengnon. Nangning kedok abang aberi pachevangnang lapen la angbong pen akemenei athesere-heihei pachonang.