Read Karbi ISAIAH 1 Bible Online

ISAIAH 1 - Karbi bible

ISAIAH 1

¹Laso aloh ke Judah arecho Uzziah, Jotham, Ahaz, lapen Hezekiah arni ahut Judah lapen Jerusalem aputhak Amoz asopo Isaiah aphan Arnam kepaklang abirta-heihei dolo.

²HEMPHU pulo, “Pirthe lapen ing-hun a-sining, ne kepu alam arjutha! Ne kechopathe aso nebe thurkrap lo.

³Chainong ta ahemphu aphan chechini, lapen gadha atum ta latum aphan ahemphu kepacho adim chechini. Bonta Nerat-aso Israel atum chechinine. Latum thangnat ta chechinine khangjang.”

⁴Nangtum kevirlo, nang pap pen keplengset adet, nangtum tangka chochot atum lapen kehingno arat! Nangtum apapsi nangtum aphan arum nangsan ponlo! Nangtum HEMPHU aphan, Israel a-Kangthir a-Bang aphan dengmolo, lapen laphan nangtum panungkuk lo.

⁵Nangtum kopisi kethur-krap bomlangma? Nangtum aphan ongmuchot aduk nangpi nangjilang ma? Israel, nangphan ameksi plengset lo, lapen nangning-nang-ingthin ta keso lo.

⁶Nangbang arpum, nangphu pen nangkeng an amek kave adim avedet lo. Nang ok ingjirni lo lapen amek kanglunlan lapen amek-heihei klangsak lo. Nangreng amek-heihei chamchepinlang mate perpepinlang. Lahei aputhak jangthu hi-he pin lang.

⁷Nangtum adet rongmanlo, lapen nangtum arongsopi-heihei me keisi parujap lo. Nangtum angno amat bang atum nanglongle cherai det lo, lapen asontin ta pavir et lo.

⁸Jerusalem det lo, la ta isi kekompet arongsopi, drakha ahidi kehon amandu mate thoithe ahidi amandu asonsi kerai abang ave asonsi kedolo.

⁹Ajehak arat atum aphan HEMPHU parengrelang asonte Jerusalem ta Sodom lapen Gomorrah ason virdet khangjangji apot lo.

¹⁰Jerusalem, nang kepangri atum lapen nangrat atum Sodom lapen Gomorrah asor ason lo. Nangphan HEMPHU koisi nangkepu ma arjuduntha. Nang Arnam kopisi nangkethanjima lale nangno chedendun non.

¹¹Alangli pulo, “Nephan kethokbomji lahei kedo-an athok ajir ne kenangji putong nang kematha ma? Nang kethok kephrin abiresak lapen athu kedo kangtulim api-heihei anta dorphlup lo. Chainong biresak lapen bi-heihei avi along nening ingsamse.

¹²Nang nephan karchoji kevang ahut komatsi nangphan kevan nangji pu nangkepu lo? Komatsi lahei kardomhemthepi arlo kepatekungji nang ketoi lo?

¹³Nangtum athok-heihei nelong kevan thang ale ave. Nang kethor amethek nephan padonorong-lo. Nangtum chiklo-kemi arong-aje-heihei, kesang-arni-heihei nangtum dhorom akechingrum-heihei along ne nangdodun ingtungte. Lahei nangtum apap-heihei pen ajok ingthirthe tang-lo.

¹⁴Nangtum chiklo-kemi arong-aje lapen kangthir arni-heihei ne hijimlo. Lahei ne kechechak kelaknang nephan isi anghorchot.”

¹⁵Nang kardom nangri kechirung ahut, ne nangphan nanglangle lo. Nang un-an ardom seta, ne arjuje, athema nangri-heihei avi aphik si chingluthip.

¹⁶Nang methang chechamra chepangthirnon. Ne nang-kethek long keklem akehingno an ingtonnon. Ahok lo kehingno keklem ington non.

¹⁷Lapen akeme keklemji charli non. Ahokpet keklemji le kechenek kepho atum aphan lapen jangreng atum aphan halatum kelongji ason rai dun non, lapen hemepi atum aphan chedanpi dun non.

¹⁸HEMPHU pulo, “Non lamthama chetok lonang, Nang pap er-tan lo, seta ne nangphan ar-e-kelok athan ason palokphlanji. Nangphik-le ersip setame, nangphan phelo ahon ason palokphlanji. La erdang seta ul ason palokphlanpo.

¹⁹Nangtum jongsi nekroilote, longle kepathe akeme ason cholongji.

²⁰Bonta nangtum nephan kroikre lote, nangtum nokjir pen ajok thivek po. Ne HEMPHU si pulo.”

²¹Ehut isi kekroithirklong arongsopi non akhat-kave asonsi klemlo! Ehut isi la dhoromi amonit si plengset, bonta non pran karmut atumsi dochot.

²²Jerusalem, nang ehut isi rup ason, bonta non nang dor ave; nang hor akleng ason, bonta nang ke non lang saide lo.

²³Nang jalin atum kethurkrap atum lapen kanghu ajirpo atum lo; latum kaita dan lapen kevan atangka cho-enver. Latum kangsaihem jangreng atum aphan rai dunde mate hemepi la pho seta rap dunde.

²⁴Lasi non, jakongkethe HEMPHU, Israel akangtangnei a-Arnam kepu alam arjutha: “Nangputhak ne klemvekji. Tasam aju kepave ason ne nangpangthirji, lapen kangthirthe ason an var et ji.

²⁵Ne neri nangphuthak bat thupo; Ne nangju pavedet khangjangpo lapen nang pen kepangvui amar an paprekpo.

²⁶Aphrang ason nangphan kepangri atum lapen thanpare atum ne nangpiji. Anke Jerusalem aphan dhoromi lapen kekroithirklong Arong-sopi pu hangpo.”

²⁷Pima HEMPHU ke dhoromi, alangli Jerusalem lapen la along kedo aningkecherui abangphutin aphan pajokji.

²⁸Bonta pap keklem atum an lapen la abe kethur atum an aphan alangli sorlamji; alangliphan ke-o aphan la pathiji.

²⁹Thengpi lapen Kangthir aberi -heihei aphan karcho apot nang ningche-oiji.

³⁰Phongrong athengpi ason lapen lang baduta kechorche aberi ason nang chekeduji.

³¹Sok anar me keisi kepacho asonsi jakongkethe amonit aphan halatum amethang akam kehingno pen ajok pavir po, lapen la kepavir ahut baduta khang un-e det po.