Read Karbi ISAIAH 10 Bible Online

ISAIAH 10 - Karbi bible

ISAIAH 10

¹Nangtum kevirlo! Rat aphan kechenekjisi nangtum aron re selamlo.

²Lasonsi nangtum keduk atum aphan kelangji a-ot lapen ahok akangsai pen pahelo lo. Lasonsi heme-jangre amar nangtum enlo.

³Arnam nangtum aphan aduk nangkepi ahut nangtum kopisi klempoma? Kehelo adet pen nangtum aphuthak alangli kesung vanlote nangtum kopi klemji ma? Kerap kelongji aphan nangtum konatsi kekatpo? Nangmar konatsi kepatu po?

⁴Ron along nang thinangpo kalite nang-nep pondetsi nangchethur ponpo. Lapu-an seta HEMPHU aningkethi hamhelang, bonta aduk kepijisi alangli ri chirungding jilang.

⁵HEMPHU pulo, “Assiria! Neningkeso atum aphan aduk kepijisi Assiria nangphan ne isi achin ason nangrimpo.

⁶Arnam kekroikre nening kepapung akhei aphan kepatengkhengjisi ne Assiria aphan toipo. Latum mar kepaponji aphan, kepanghu aphan, lapen tovarpi-heihei aduk ason rat aphan kepatekungji aphan Ne toitang-lo.”

⁷Bonta Assiria Arechokethe aning arlo la kephangnoji akemang-heihei do. Alang ongdung adet aphan kepa-virji mathathip lo.

⁸La chepindak lo, “Ne ron apinpo abangphutin ta inut arecholo!

⁹Ne Kalno lapen Karkemish, la Hamath lapen Arpad arongsopi, cherai det lo. Ne Samaria lapen Damaskas ta cherai det lo.

¹⁰Kumlin-heihei karcho akhei lapen Jerusalem lapen Samaria apar kumlin ke-ongmulang akhei aphan aduk kepijisi ne ri chirung-lo.

¹¹Samaria lapen la akumlin kedo-an ne pavirlo, lapen lasonthotsi Jerusalem lapen hadak karcho akumlin-heihei aphan klempo.”

¹²Bonta HEMPHU pulo, “Ne Zaion Anglong along lapen Jerusalem along keklem nangji ason an klem pajutsi, Assiria Arechokethe aphan Ne aduk pipo, pima la kechepindak an lapen cheparoka an apot.”

¹³Assiria Arechokethe chepindak lo, “Latum ne jakong do-an pensi klemlo. Ne ingtangrak, bidi do, lapen reset. Det-heihei angbong ahoi-heihei ne paphrai lo, lapen latum kebi kecho amar ponpi et lo. Chainong alo asonsi hadak kedo arat aphan ne patekung-lo.

¹⁴Pirthe adang det-heihei atum ke isi vo-atar asonlo, voti kepangrum joipik. Nephan akhi ne kepangrum joipik. Nephan kepaphereji arveng ejeng bak anta chirung haihe; kehangchir ji angho anta chingpu haihe!”

¹⁵Bonta HEMPHU pulo, “Cho kerim abang apar cho themu pu chepu unji ma? Kephlak abang aphan apar korot mate phrat chepathe unji ma? Chin monit aphan rung un-e, monitsi la rung lo.”

¹⁶Jakongkethe HEMPHU-si aduk kepiji aphan non kelengbong atum aphuthak ke keso nangtoipo. Halatum a-ok arlo me kechobom akeso doji.

¹⁷Arnam Israel akethe-ang, isi ame cheplangpo. Israel Kangthir-et Arnam, me-de cheplang si arnisi angbong kedo-an ta cho-et po bap-bi anta.

¹⁸Ador kedo a-ingnam lapen ketike alongle-heihei keso le inut amonit aphan kepavir asonthotsi pavirdet khangjangpo.

¹⁹Hadak lapu-an thengpi kavepo, lahei oso inut anta lakha undet po.

²⁰Israel arat kerenglang atum alang-tum aphan kepavir-rang adet aphan kechikimoji arni nangle tang-lo. Latum ahokpet pen Israel a-Arnam Kangthir HEMPHU aphan chiki pame po.

²¹Ajehak Israel arat-atum Jakongkethe Arnam anat nangchiruithuji.

²²Non Israel arat-atum talo asangti mili ongdung seta, ajehak atumsi nangchevoichotji. Kevir rat-atum ingtonpring-lo, lapen lake a-ot lo.

²³Alangli kepu atengsi det adang bithe Jakongkethe Muluk-a-Hemphu si kevir vanpo.

²⁴Zaion Anglong kedo arat aphan Jakongkethe Muluk-a-Hemphu pulo, “Ijip asor nangtum aphan nangchenek ason Assiria atum nangchenek seta latum aphan nangtum phereri.

²⁵Malomso aphi Ne nangtum aphan aduk-kepi pajut det po, lapen Ne halatum aphan pavir et po.

²⁶Ne Jakongkethe HEMPHU-si, Oreb Arlong along Media arat-atum aphan kerap-i-achampre pen Ne latum aphan rap-lo. Ijip aphan Ne aduk kepi asonsi Assiria atum aphan Ne aduk pipo.

²⁷Halaso apor nangkele ahut, nangtum aphan Ne, Assiria ajakong pen pajokpo, lapen halatum ajuali nangtum aphangkor athak dolong verve det po.”

²⁸Hotur aron-asong atum Ai arongsopi cherai det lo! Latum Migron angbong dampet lo! Latum Mikmash along kecho amar chebitekang-lo!

²⁹Latum inglong adak atovar hatpetsi Geba along ajo sa-lo! Ramah arong asor pherepik lo, lapen Sol Recho arong Gibeah asor be phlung-lo.

³⁰Hangcharbu non, Galim arat-atum! Laisha arat-atum arjutha! Anathoth arat-atum thakdun non!

³¹Madmenah lapen Gebim arat-atum apran chepajokjisi be phlung-lo.

³²Pini hotur-atum Nob arong dolo, lapen Zaion Anglong, Jerusalem arongsopi along halatum ari chirungsi chepangtang-lo.

³³Jakongkethe HEMPHU, latum aphan thengpi aro keteng asonsi arum paklo rop-rop po. Anekethenei lapen latum angbong kangtuinei abangphan chorpetsi patherak po.

³⁴Nampi angbong cho pen thengpi kepakrep ason lapen Lebanon athengpi kemenei kekli ason latum aphan HEMPHU chorpetsi paklipo.