Read Karbi ISAIAH 13 Bible Online

ISAIAH 13 - Karbi bible

ISAIAH 13

¹Lake Bebilon aphan abirta lo, la Amoz asopo Isaiah si Arnam pen long-lo.

²Aho-or kave anglong athak ron alama tarlo! Ron-aso atum anat hangnon lapen anekethe arongsopi anghap ketengkhengji angthek nangri chirung non.

³HEMPHU amethang aningkechedok lapen kechekiklong aron-aso atum aphan hangsi ron kangthir chedanpo lapen Alangli aningkejangje atum aphan aduk pipo.

⁴Inglongpi athak kehangjo ase arjutha-armu ongdung arat ase, khei-heihei lapen det-heihei keching-rum arki. Muluk-a-Hemphu ron kechedanjisi Alangli ron-asong pachesik lo.

⁵Latum kehelo adet-heihei pirthe kejut pensi kevang. Det adang kephangnojisi HEMPHU aningkethi pen vang-lo.

⁶Hangcharbu non! Pima HEMPHU arni tebok-het lo, la Jakongkethe abang kevir kevanji arni lo.

⁷Abang-phutin ari ajakong ave det po, lapen abangphutin angthin chepathe haihe det po.

⁸Halatum kedo-an pherephrat po lapen arloso oso mahang kepathek akeso asonsi sopet po. Latum lahin lahin chepheresoisi chelang dingdang po, amahang ketherak pen ikkuipo.

⁹HEMPHU arni nangletang-lo, Alangli ningkethi lapen aningkepung kepherememe arni lo. Pirthe kejejang-tang ajo pinchong det po. Lapen papi abangphutin aphan pavir det po.

¹⁰Chiklolongso ajontin lapen la achomtin the-ang-e det po, arni kevang ahut ingtingkuk po, lapen chiklopi ta atur turte det po.

¹¹HEMPHU pulo, “Ne pirthe athak kevir vanpo, lapen kehingno atum apap-heihei aduk pipo. Anekethe abangphutin aphan ne pabihekji lapen kecheparoka lapen aningkeso atum abangphutin aphan aduk pipo.

¹²Kerenglang atum ser an sose tang-re po.

¹³Ne sining paklemhur po, lapen Ne, Jakongkethe HEMPHU neningkethi kepaklang arni pirthe ta la kedo adim pen hijuk detji.”

¹⁴Bebilon along kedo bang adet aso atum methang adet-heihei kat etji, kenep atum pen kepaphlung athijok ason, kevibang kave abiresak atum ason.

¹⁵Kenep long abang chut bop po.

¹⁶Latum cherapdunthekthe ahut oso thi-i atum aphan varbob-bob po, ahem kurukthai po, halatum apiso atum aphan langrem det po.

¹⁷HEMPHU pulo, “Ne Medes atum aphan Bebilon patengkhengjisi pathurlo. Latum rup, longle lapen ser aningdokde.

¹⁸Halatum athai lapen aso-heihei pen risomar atum aphan pathi po. Latum oso thi-i atum aphan jinsose lapen osomar aphan chinghonhe.

¹⁹Bebilon ke kedo-an adet angbong kelangmeneilo; la arat atum laphan anong-lo. Bonta, Ne, HEMPHU, Sodom lapen Gomorrah aphan kevi asonthot Bebilon pavirpo!

²⁰Hadak baduta puthot dode det po. Hadak kecheterekvoi Arab atum apehem chesangse lo, lapen hadak baduta kevi-abang seta abiresak pachopan pe det po.

²¹Hadak ingnam api atum kedo adim plangpo, lapen vo-dudu atum atar cheselampo. Ostrik avo hadak dopo lapen karju api-heihei keru adim kanpo.

²²Hemthengsong lapen rechohem-heihei adim mahar lapen serung atum kangrong angtong dopo. Bebilon arni vangtang-lo. Bangpi arni jut dap po.”