Read Karbi ISAIAH 14 Bible Online

ISAIAH 14 - Karbi bible

ISAIAH 14

¹HEMPHU puthot arat aso Israel aphan ingjinsoji lapen latum aphan amethang ason chingvaithuji. Alangli latum aphan puthot halatum amethang alongle along pachedo longji lapen bang-adet atum ta vangsi latum pen-pen dorap pet ji.

²Ongdung amonit atum Israel atum aphan HEMPHU kepi alongle along pachedamji aphan rap dunji lapen hadak khei-heihei atum ban ason Israel atum aphan ingdukji. Israel aphan ihut isi kecheraidet atum non halatum aphan Israel atum cheraidet po, lapen ehut isi Israel atum aphan kechenek atum aphuthak Israel atum pangri po.

³Israel arat aphan keso pen, kesung pen, lapen halatum aphan jakong akam kepaklem bor-i toi, akam pen HEMPHU latum aphan anghor pang-ar po.

⁴La Alangli klemlote, latum Bebilon adet arecho aphan chongthuisi pupo: Kechenek-ot arecho kreptang-lo! Non la badu aphan ta puthot chenek longle lo!

⁵Kehingno pangribang atum kethedung pen rat aphan kechenek

⁶lapen alangtum kehaidet akhi aputhak kepasung kangtonte atum ajakong HEMPHU pavir tang-lo.

⁷Non ke pirthe adang sanglong-lo lapen ningkangsam si dolo lapen abangphutin ta ning-arong alun lunjo lo.

⁸Saipras arong lapen Lebanon a-Kedar athengpi arong kekreptang arecho aphuthak chehok lo, pima halatum aphan non keteng abang avelo, non la dam-et lo,

⁹Kethitang apirthe ke Bebilon adet arecho aphan kedengjisi chesikding-lo. Pirthe kedo ahut kangtangpik atum akarjong atum klemphro-phra lo. Recho akarjong an halatum anghoi-heihei pen thurverlo.

¹⁰Halatum laphan hangjo lo, “Non nangta netum ason jakong avelo! Nangta netum angbong inut lo!

¹¹Nangphan kumbeleng alun pen manchepi lo, bonta ladak non nangta kethitang apirthe arlo si dolo. Nang ingki avosok athaksi i-nang-lo, lapen ingthan ape si che-um nang-lo.”

¹²Lusifar, Klirdap achiklolongso, nang sining pen nangklotang-lo! Aphrang nang khei-heihei aphan haidet lo, bonta non nangphan longle athak nangvardup lo.

¹³Nang sining angsong anta karluji aphan mathathip lo, lapen kangtuinei achiklolongso apar nang recho anghoi pangtuimuchotji nangninghang-lo. Nang nirep anglong-pi along arnam atum kechingrum adim recho ason kangniji mathalo.

¹⁴Nangchepulo, nang ha inghun-heihei angsong an arludamsi Jakongkethe a-Bang ason cheplangji.

¹⁵Bonta nangphan kethitang apirthe aklongsi nangvan det lo.

¹⁶Kethitang atum nangphan nang-lang phrong po lapen nanglangpeng po. Halatum nang arjupo, “Labangso amonit helo ma pirthe kehijuk lapen det-heihei paklemhur abang?

¹⁷Labangso amonit helo ma rongsopi-heihei kepavirsi rongman kepaplang abang? Labangso amonit helo kebeng atum aphan kelole mate ahem pachedam longle abang loma?”

¹⁸Pirthe arecho atum an ahir-asang athiri alongsi dolo, bonta nangke nangthiri ave, lapen nangbang arpum kepathujisi varchorlo. Laso athak ron along kethi aron aso abang arpum arlong ahilik arlo kevar-kedong tang bap-het lo.

¹⁹Bonta nangke nangthiri ave, lapen nang kethi-arpum varchorsi pathulo. Lasonsi ron-aso atum ron along kethi arpumsi dipthip-lo, lahei arlong ahilik arlosi varlo, lapen dongruilo.

²⁰Pima nangdet nangcheparu lo, lapen nangmethang arat-aso aphan pathi lo, nangphan akaprek arecho atum ason ke nangpip-pe lo. Nanghemtun kehingno inutbak abangphu ta reng-longle lo.

²¹Kechethu-kechethat papangchengnang! Laso arecho asopo-mar atum thiji pima halatum aphusar atum apap-heihei apot. Latum angbong inutbak ta pirthe pangri longle lo mate rongsopi-heihei la padothip longle lo.

²²Jakongkethe HEMPHU pulo, “Ne Bebilon tengkhengsi la parupo. Ne thangnat asonta bibelo, osomar anta, kerenglang ahin anta bibelo. Ne HEMPHU-si putang-lo.

²³Ne Bebilon aphan jok-hi, vo-dudu-heihei kedo adim paplangpo. Ne isi arphek pen Bebilon arkok po, lapen la asontin ta arkok ponlor po. Ne Jakongkethe HEMPHU-si, putang-lo.”

²⁴Jakongkethe HEMPHU isi aseme tang-lo: “Ne kopima kemang, plangvek po. Ne kopima klemji pu kemathathip ason klemvek po.

²⁵Israel ne longle along Assiria aphan Ne pavir vek po, lapen ne inglong-heihei athak halatum aphan dongpo. Assiria arphang Ne rat-aso aputhak halatum arpu inghor-heihei pen Ne pajok po.

²⁶Lahelo pirthe aphan Ne kemang, lapen det-atum aphan aduk kepijisi Ne ri chejarding-lo.”

²⁷Jakongkethe HEMPHU ke la keklem jisi, lapen aduk kepijisi Alangli ri chejarding-lo, lapen Alangliphan baduta khang un-e lo.

²⁸Ahaz Recho kethi aningkan kepachethang abirta lahelo.

²⁹Philistia arat, nangphan karbu-i achin lokpet lo pura nang chehok nangne. Ejon apherui thilote laso adim kehingno ajon kaprek vang-lo. Pherui ati kangjar apherui chehangthepi si aso pavangpo.

³⁰Keduk amethang arat aphan HEMPHU-si kevibang plangpo lapen latum aphan kejokvan adim padolongpo. Bonta nangtum Philistia aputhak isi kepherememe akhim Alangli nangtoipo, lapen la nangtum badu aphanta akereng nang bibelo.

³¹Hangprak-ra, kerap kelongjile chiru non, nangtum Philistia arongsopi an! Nangtum kedo-anta pherehur non! Nirep anat pen aduk anghun ethan vangbomlo lake angthin kebi aron asong lo.

³²Philistia pen kevang apherangke atum aphan ili kosonsi thakdun poma? Halatum aphan eli thakdunpo, HEMPHU-si Zaion pathirlo anke hadak Alangli kesung arat-atum kejokvan long po.