Read Karbi ISAIAH 16 Bible Online

ISAIAH 16 - Karbi bible

ISAIAH 16

¹Sela arongsopi pen kejejangtang ajo Moab arat-atum Jerusalem along kepangri abangphan biresak aso ejon isi anong-e pilo.

²Arnon Aroi akung latum chonghong ding-lo lapen mangmepinsi vo-atum aphan atar pen kephlungjui asonsi helat voi-vai lo.

³Judah arat-aso aphan latum pulo, “Netum kopima keklemnangji nethantha. Anerlochitim arni keso abin kepangsam athengpi arong ason netum aphan neraiduntha. Lapen nangtum abin along netum aphan pasang longtha. Netum chepachong adim keri atum lo; netum aphan keri longle adimle nepatu non.

⁴Nangtum adet netum aphan pado longtha. Netum aphan kepavirji atum pen nepajoktha.” (Kechenek lapen kepavir jut po, lapen det kephangno atum dam et po.

⁵Anke David asomar angbong inut abang recho plangpo, lapen alangli kekroithirklong lapen kanghon pen rat pangripo. Kopima akeme alangli prapjin pen klempo, lapen ahok-akangsai pen keklem petji aphan alangli langpo.)

⁶Judah arat-atum pulo, “Moab arat-atum chepindak-o pu netum arjulong-lo. Latum cheparoka-o lapen amethang chemathalok pu netum chini, bonta latum akechepindak ke thangnatta ave.”

⁷Moab arat-atum ke latum kesung kechechak nang apot chirupo. Kir Heres arongsopi along latum kecholang akeme ason aning chematha dam lote. Latum do-an chiruji. Latum aphan langretsi phlungjui po.

⁸Heshbon adung ahidi lapen Sibmah adrakha-beri-heihei pavir et-lo. Lahei adrakha-beri along det-heihei pangribang atum aphan horpangri lo. Ehut isi Jazer arongsopi anat anta drakha rikang dothip lo, lapen kejejangtang ajo arlo nihang anat, lapen Talo Kethi ahin kaprek anijang anat anta ledamlo.

⁹Jazer aphan ne kechiru asonthotsi, Sibmah adrakha arikang aphanta ne chirulo. Heshbon lapen Elealeh aphanta nemekri bulo, pima rat aphan aning keparongji aphan kerot longji ave.

¹⁰Baduta aho-or kedo ahidi-heihei aphan aning cheparong-re. Drakha-beri-heihei along baduta hangserse lapen lunle. Baduta drakha athe sorse; ning-arong ase jut-kok lo.

¹¹Ne Moab aphan ningduk pen lapen Kir Heres aphan ning-oi pen chiru lo.

¹²Moab arat-atum ningrunhup pen halatum kangthir adim-heihei lapen kardomjisi Kardomhem damlo, bonta latum aphan la thangnat ta meme det po.

¹³Lahelo aphrang Moab aphuthak kepitang HEMPHU abirta lo,

¹⁴Non HEMPHU pulo, “Ningkan kethom chokchit lote Moab akhi kethe avedet po. La ongdung arat ta, asap-o atumsi reng-longchotji, lapen latum ajakong avedetpo.”