Read Karbi ISAIAH 19 Bible Online

ISAIAH 19 - Karbi bible

ISAIAH 19

¹Ijip aphan birta lahelo Ijip anat HEMPHU vangpo, inghun athak ardonsi prapjin pen vangpo. Alangli ingno Ijip akumlin klemhurlo lapen la arat-aso angthin thehaihe det lo.

²HEMPHU pulo, “Ijip angbong hem isi Ne ron pathurpo lapen korte hijan, tebok hijan pachethur po. Kechelang un-e arongsopi hijan ron chedan po, lapen kechelang un-e arecho-atum jakong kelongji aphan bor-i-po.

³Ijip parunhup po lapen halatum a-ot phangnopo. Latum aphan kepavirjisi latum akumlin-heihei aphan charjudampo, lapen latum sanglongpo, lapen paludep po.

⁴Latum aphuthak kepangrijisi inut kesedeng lapen kesupong arecho arideng Ne hodai det po. Ne Jakongkethe HEMPHU-si pulo.”

⁵Nil alang ingdaihek po, lapen langroi thepbompo.

⁶Langkethepbom ahut lang adang an nemsohaipo. Arpik lapen, ingkera ta thikhraipo,

⁷Nil aroi akung-kung ketiki asai an sek po lapen jap pon et po.

⁸Nil alang ok-keri pen chepareng abangphutin atum hangprakpo lapen alan-heihei akam vangve det po.

⁹Pe kanglit keselam atum aning runhup ji;

¹⁰Pe-kethak lapen asai kethek akam keklem atum aphan ingdi etji lapen aning oi-pikji.

¹¹Zoan arongsopi ajalin atum kelu saide! Ijip kerenei amonit atum kelu abidi si pilo! Kopusonsi latum hako athekkere lapen recho arecho atum apoton lo pu recho aphan kechethan hai-lo?

¹²Ijip arecho, halahei nang kereset thanpare atum konat lo? Ijip aphan Jakongkethe HEMPHU kopisi kemang-loma latum nangthan thek tahai.

¹³Zoan lapen Memphis ajalin atum kelu saide. Latum det keja nangji atum lo, bonta latum la pamanghulo.

¹⁴HEMPHU-si latum aphan kemanghu athanpare toilo. Atheke Ijip ajat ta kechokchesi klemlo lapen horkangri kekrep-ring abang asonsi akeching-ok adim kechedong phrui asonlo.

¹⁵Ijip along keplang, mate keduk, arlengkethe mate arlengso, ta kerap pajir thekthe det lo.

¹⁶Ijip atum arlosomar ason therakju apor nangleji. Latum aphan aduk kepijisi Jakongkethe HEMPHU ari kejarding thek longsi latum kephere klemhurpo.

¹⁷Aphongtin ta Judah arat pen ajok Ijip arat atum pherepo, latum akopai Jakongkethe HEMPHU-si pathek tang-lo pu latum aphan pachematha-thupo.

¹⁸Halaso apor nangkele ahut, Ijip arongsopi longpho adim Ibri alamsi ningje po. Rat-atum Jakongkethe HEMPHU amen pensi semetangpo. Isi arongsopi abang ke, “Arni Arongsopi” pu si irpo.

¹⁹Halaso apor nangkele ahut, Ijip adet along HEMPHU aphan isi adovan dopo, lapen Ijip ahoi along Alangliphan kepanong a-arlong anujok kesom dopo.

²⁰Lahei Ijip along HEMPHU dolo pu angthek plangpo. Hadak kedo arat atum aphan kechenek pholote lapen HEMPHU aphan hangser lote latum aphan kepajokji aphan Alangli inutbak nangtoipo.

²¹Ijip arat aphan HEMPHU amethangsi chepaklangpo, anke latum Alangliphan keropipo lapen archopo, Alangliphan athok-heihei lapen dan-heihei van pipo. Alangli ingno latum chechak pamepo lapen latum kechechak ateng klempo.

²²Ijip aso aphan HEMPHU aduk pipo, bonta latum aphan Alangli aphi pamepo. Latum Alangli nat pangnopo, lapen Alangli latum akardom-heihei arjupo lapen pamepo.

²³Halaso apor nangkele ahut, Ijip lapen Assiria angbong tovarthepi doji. La hini adet arat atum latum angbong lahin lahin chedam chevang seroipo, lapen detni atum archorappet po.

²⁴Halaso apor nangkele ahut, Ijip lapen Assiria atum pen Israel chingbarchit po, lapen detthom atum pirthe adang aphan isi ahirjume plangpo.

²⁵Jakongkethe HEMPHU latum aphan pahirme po lapen pupo, “Nang Ijip nerat-aso; nang Assiria ne nangpinchong tang-lo, lapen nang Israel, ne kangvaitang arat, ne nang pahirjumepo.”